Accessibility links

سێ خۆکوژ خۆیان لە بازگەی سلێمان بەگی خورماتوو دەتەقێنـنەوە


پـێش نیوەڕۆى ئەمڕۆ سێشەممە 3 كەسى خۆكوژ لە بازگەى سلێمان بەگى سەربە قەزاى خورماتوو خۆیان بە هێزەكانى حەشدى شەعبیدا تەقاندەوە، هەروەها كۆمپانیاى غازى باكوریش لە باشورى ڕۆژئاواى كەركوک موشەكباران كرا.

محەمەد فایەق بەرپرسى راگەیاندنى قایمقامیەتى قەزاى خورماتوو، بە دەنگى ئەمەریكاى راگەیاند"بەهۆى خۆ تەقاندنەوەى 3 كەسە خۆكوژەكەوە، 4 چەكدارى حەشدى شەعبى گیانیان لەدەستداوە و 5 چەكدارى تریش برینداربوون."

وتیشى" خۆكوژەكان ئۆتۆمبێلێكى جۆرى تاكسى یان پێبووە و جل‌وبەرگى سەربازیان لەبەر بووە."

بەپێى ئەو زانیاریانەى دزەیانكردووە، حەشدى پێیوایە كە 3 خۆكوژەكە لە قەزاى خورماتووەوە رۆیشتوون و خۆیان بە بازگەكەدا تەقاندووەتەوە، بەڵام دامودەزگا حكومیەكانى خورماتوو هێشتا زانیاریان لەو رووەوە لەبەردەستدا نیە.

هەر ئەمڕۆ كۆمپانیاى غازى باكور لە باشورى كەركوک، بە 6 موشەک بۆردومانكراو بەو هۆیەوە كارمەندێكى كوردى كۆمپانیاكە برینداربوو ، هەروەها زیانى مادى بەر كۆمپانیاكە كەوت.

عەمید خەتاب عومەر بەڕێوەبەرى گشتى پۆلیسى كەركوک، بە دەنگى ئەمەریكاى راگەیاند"پێدەچێت موشەكەكان لەلایەن هێزە گەرۆكەكانى داعشەوە ئاڕاستەى كۆمپانیاى غازى باكور كرابن."

روونیشیكردەوە لە نێو بارەگایەكى كۆنى بەعسیشدا یەك دوو تەرم دۆزراونەتەوە و ، لە ئێستادا سەرقاڵى لێكۆڵینەوەن تا بزانن جێگەكە گۆڕى بە كۆمەڵە یان تەنها ئەو چەند تەرمەى تێدابووە.

موشەکبارانكردنى كۆمپانیاى غازى باكور و خۆتەقاندنەوەى ئەو 3 خۆكوژە لە كاتێكدایە، داعش بە درێژایى سەنگەرەكانى كەركوک و گوێڕ جموجۆڵى هەیە و لە هەندێک ناوچەش لە پێكداداندایە لەگەڵ پێشمەرگە.

XS
SM
MD
LG