ئەمڕۆ پـێنجشەممە 3 ئۆتۆمبێلى بۆمبڕێژکراو لە 3 بازگەى سەر رێگەى کەرکوک- بەغدا و لە سنورى قەزاى خاڵس ى پارێزگاى دیالە تەقینەوە، بەو هۆیەوە 4 کەس گیانیان لەدەستدا و 14 کەسى تریش بریندار بوون.
هۆشیار ئیسماعیل ئەندامى ئەنجومەنى پارێزگاى دیالە، بەدەنگى ئەمەریکاى راگەیاند"دەزگا ئەمنیەکان شۆفێرى یەکێک لە 3 ئۆتۆمبێلە بۆمب رێژکراوەکەیان دەستگیر کردووە، بەڵام لەرێگەى ریمۆت کۆنترۆڵەوە خۆى تەقاندوەتەوە."
بەپێى ئەو ئەندامەى ئەنجومەنى پارێزگاى دیالە، هێزە ئەمنیەکان لەناو قەزاى خاڵس و بازگەکانى دەوروبەرى خراونەتە حاڵەتى ئامادەباشیەوە ، چونکە زانیارى لەبارەى دزەکردنى دوو ئۆتۆمبێلى ترى بۆمب رێژکراو بەوان گەیشتووە.
رەوانەکردنى ئۆتۆمبێلى بۆمب رێژکراو بۆ ناو شاروشارۆچکەکان ، لە کاتێکدایە داعش جگە لەمەفرەزەى گەرۆک و بچوک هێزى گەورەى لەپارێزگاى دیالەدا نیە، بەڵام بەپێى وتەى بەرپرسان زۆربەى ئەو ئۆتۆمبێلە بۆمبڕێژکراوانە لە ناوچەى عوزێم و ناوچە دوورە دەستەکانى دیالە ئامادە دەکرێن و رەوانەى ناو شاروشارۆچکەکان دەکرین.
عەقید جمهور رۆستەم فەرماندەى پێشمەرگە لە پارێزگاى دیالە، بە دەنگى ئەمەریکاى راگەیاند"زۆربەى ئۆتۆمبێلە بۆمب رێژکراوەکان لە گوند و ناوچە سونەنیشینەکان ئامادە دەکرێن و رەوانەى ناو شارەکان دەکرێن بۆ تەقاندنەوە."
قەزاى خاڵس ى پارێزگاى دیالە زۆربەى دانیشتوانەکەى شیعە مەزهەبن و یەکێکە لەو ناوچانەى کە لە ماوەى چەند ساڵى رابردوودا زۆرترین کردەوەى توندوتیژى تێیدا روویداوە.
