فەرماندەیەکى باڵاى حەشدى شەعبى لە ناوچە کوردستانیەکانى پارێزگاى دیالە، ژمارەى چەکدارەکانى داعشى لەو ناوچانە بۆ دەنگى ئەمەریکا ئاشکراکرد، ئاماژەى بەوەکرد ژمارەیەک چەکدارى داعش لە موسڵ و حەویجەوە گەڕاونەتەوە بەرەو گوندە کوردستانیەکانى دیالە.
ئەبو مونتەزر فەرماندەى باڵاى حەشدى شەعبى لەپارێزگاى دیالە، بەدەنگى ئەمەریکاى راگەیاند"لەچەند رۆژى رابردوودا هێزەکانمان هێرشیانکردووەتە سەر چەند ناوچەیەک ، کەژمارەیەک چەکدارى داعشى لەو چەکدارانە تێدا بووە کەلەموسڵ و حەویجەوە گەراونەتەوە."
دەوروبەرى دەریاچەو زنجیرە چیاى حەمرین و ناوچەى نەداى نزیک ناحیەى مەندەلى پارێزگاى دیالە لەو ناوچانەن کە لەئێستادا ژمارەیەک چەکدارى گەرۆکى داعشیان تێدایە ، کە ئەو چەکدارانە ناوبەناو پەلامارى پێشمەرگە و سوپاى عێراق دەدەن.
دەربارەى ژمارەى چەکدارەکانى داعش لەناوچەى نەداو سنورى حەمرین ، ئەبو مونتەزر وتى "ناوچەى نەدا 80 بۆ 90 چەکدارى داعش و حەمرینیش نزیکەى 65 چەکدارى تێدایە."
لاى خۆشیەوە عەقید کاوە محەمەد فەرماندەى هێزى پێشمەرگە لە ناوچەى کۆباشى باشورى قەزاى خانەقین ى پارێزگاى دیالە ، بە دەنگى ئەمەریکاى راگەیاند"ئەو چەکدارانەى داعش کە گەراونەتەوە بۆ ناوچە کوردستانیەکانى دیالە لەو ناوچانەن کە لەژێر کۆنترۆڵى حەشد و سوپاى عێراقدان ، بەڵام ناو بەناو هێرش دەکەنە سەر رەبیەکانى پێشمەرگەش."
ناوچەى نەداى نزیک مەندەلى و دەوروبەرى زنجیرە چیاى حەمرین لەپارێزاى دیالە لەدواى روخانى رژێمى بەعسەوە لەساڵى 2003 بوونەتە پێگەى گروپە چەکدارەکان ، سەربارى بوونى هێزە ئەمنی و سەربازیە عێراقیەکان لەو ناوچانە بەڵام نەتوانراوە سنور بۆ چالاکى و جم و جۆڵى گروپە توندرەوەکان دابنرێت.