Accessibility links

سەرۆک وەزیری عێراق داوا دەکات کەسانی تەکنۆکراتی بۆ حکومەتە نوێـیەکەی پـێشنیاربکەن

  • VOA News

حەیدەر عەبادی سەرۆک وەزیری عێراق داوای لە قەوارە سیاسیـیەکانی نێو پەرلەمان و کەسایەتیـیە ناودارەکانی وڵاتەکەی کردووە کەسانی تەکنۆکرات پـێشنیاربکەن بۆ ئەو حکومەتە نوێـیەی بەنیازە پـێکیبهێنێت.

تەلەفیزیۆنی فەرمی عێراق ئەمڕۆ هەینی ئەمەی ڕاگەیاند و گوتیشی لیژنەیەکی سەربەخۆ لە شارەزایان هەڵدەستێت بە بەربژارکردنی ناوەکان و دواتر لیستی ناوەکان دەخرێتە بەردەم عەبادی هەتا لە نێویاندا هەڵبژێرێت.

جێی ئاماژەیە لە مانگی ڕابردووەوە عەبادی باس لەو دەکات کە خوازیارە حکومەتێـکی تەکنۆکرات پـێـکبهێنێت و چیتر دابەشکردنی پـۆستەکان لەسەر بنەمای سیاسی و نەتەوەیی و ئاینزایی نەبن.

ڕۆژی چوارشەممەش سەرۆک وەزیری عێراق لە فەیسبوکەکەی خۆی نووسیویەتی لەم زووانە گۆڕانکاری بنەڕەتی لە حکومەتەکەی دەکات و کەسانی تەکنۆکرات بۆ گرتنەدەستی ئەو وەزارەتانە پـێشنیاردەکات کە گۆڕانکاریـیەکە دەیانگرێتەوە، ئەمەش بەپـێی دەسـتور و هاوبەشی سیاسی لە نێوان پـێکهاتەکانی خەڵکی عێراق و نوێنەرە شەرعیـیەکانی.

هاوکات ئەمڕۆ هەینی بە هەزاران لە دانیشـتوانی بەغدا لە ناوەندی شارەکەیان خۆپـیشاندانی ناڕەزایـیان سـازکرد بە مەبەستی داوای گۆڕانکاری لە حکومەت و نەهێشتنی گەندەڵی لە وڵاتەکەدا.

سەڵاح بامەرنی پەیامنێری دەنگی ئەمەریکا لە بەغدا ڤیدیۆیەکی خۆپـیشاندانەکەی ناردووە.

XS
SM
MD
LG