Accessibility links

ژماره‌ی مانگانه‌ی قوربانیانی ئاکامی توندوتیژیـیه‌کانی عێراق گه‌یشتووه‌ته‌ نزمترین ئاست

  • VOA News

ئاماره‌ فه‌رمیـیه‌کان ئه‌وه‌ پـیشان ده‌ده‌ن که‌ به‌ هۆی کاری توندوتیژی له‌ مانگی ڕابردوودا له‌ عێراق 112 که‌س کوژراون ،‌ ئه‌مه‌ش که‌مترین ژماره‌ی کوژراوانی عێراقیـیه‌ له‌ مانگێـکدا له‌وه‌تای له‌ ساڵی 2003 وه‌ ئه‌و وڵاته‌ به‌ ڕابه‌رایه‌تی وڵاته ‌یه‌کگرتووه‌کانی ئه‌مه‌ریکا داگیرکرا.

ئاماری کوژراوانی عێراقی ئاکامی توندوتیژی که‌ له‌ لایه‌ن وه‌زاره‌تی به‌رگری و ناوخۆی عێراقیه‌وه‌ ئاماده‌کراوه‌ ، له‌ دره‌نگانێکی دوێنێدا بڵاوکرایه‌وه‌، هاوکات ئه‌وه‌ش ده‌رده‌خات که‌ له‌ مانگی رابردودا 357 که‌سێش برینداربوون.

ئه‌وه‌ی جێی ئاماژه‌یه‌ کۆی ئاماری کوژراوه‌کان له‌ 78 که‌سی سیڤیل و‌ 22 پۆلیس و12 سه‌رباز پێکهاتبوون.

که‌مترین ژماره‌ی کوژراوانی ئاکامی توندوتیژی له‌ مانگی 9 ی ساڵی 2009 دا گه‌یشته‌ 112 که‌س .

خوێناویترین ڕووداوه‌کان ئه‌و زنجیره‌ ته‌قینه‌وانه‌ی 20 ی مانگی رابردوو بوون، ئه‌وانه‌ی له‌ 8 شاری عێراقیدا له‌ لایه‌ن یاخیبوانه‌وه‌ ئه‌نجامدران به‌ مه‌به‌ستی له‌ باربردنی کۆبوونه‌وه‌که‌ی کۆمکاری عه‌ره‌ب، ئه‌وه‌ی له‌ به‌غدای پایته‌خت ئه‌نجامدرا.

له‌و هێرشانه‌ 46 که‌س کوژران و پـتر له‌ 200 که‌سیش برینداربوون

به‌رپرسانی عێراقی گوتیان پلانی نوێی ئاسایشی ده‌خرێته‌ گه‌ڕ بۆ خاوکردنه‌وه‌ی ڕه‌وشی توندئامێزی ئاسایشی، هه‌روه‌ها له‌ پێناو که‌مکردنه‌وه‌ی بازگه‌کانی پشکنین له‌ به‌غدا و هه‌روه‌ها له‌ شاره‌کانی دیکه‌دا.

ئه‌وه‌ی شایه‌نی باسه‌ ئاستی توندوتیژی له ماوه‌ی 3 ساڵی ڕابردوودا له‌ عێراق به‌ ئه‌ندازه‌یه‌کی به‌رچاو هاتووه‌ته‌ خواره‌وه‌، به‌ڵام یاخیبوان له‌و وڵاته‌دا به‌ مه‌به‌ستی که‌مکردنه‌وه‌ی متمانه‌ به‌ حکومه‌تی عێراقی به‌ ڕابه‌رایه‌تی شیعه‌کان ناو به‌ ناو هێرش ئه‌نجام ده‌ده‌ن.

XS
SM
MD
LG