ئه‌مڕۆ یه‌کشه‌ممه سه‌رۆک وه‌زیری عێراق نوری ئه‌لمالیکی به‌ره‌و واشـنتنی پایته‌ختی وڵاته یه‌کگرتوه‌کانی ئه‌مه‌ریکا به‌ڕێکه‌وت، ئه‌مه‌ش هاوکاتی ئه‌وه‌ی دوا هێزه‌کانی ئه‌مه‌ریکا له عێراق ده‌کشێنه‌وه.
بڕیاره مالیکی له میانه‌ی ئه‌م سه‌ردانه دوو ڕۆژیـیه‌دا بۆ واشنتن، وتووێژی تێروته‌سه‌ل له‌گه‌ڵ سه‌رۆک باراک ئۆبامادا سـازبکات.
عه‌لی موسه‌ویی ڕاوێژکاری میدیای نوری ئه‌لمالیکی به ئاژانسی هه‌واڵه‌کانی فه‌ڕه‌نسی گوتووه سه‌رۆک وه‌زیر ده‌رباره‌ی هه‌موو بواره‌کانی هاوکاری وتووێژ ده‌کات و هه‌روه‌ها لاپه‌ڕه‌یه‌کی نوێ له په‌یوه‌ندیـیه‌کانی نێوان به‌غدا و واشنتن هه‌ڵده‌درێته‌وه، که پـێشـتر مه‌سه‌له لاشـکریـیه‌کان باڵی به‌سه‌ردا کێشـابوو.
شاندی یاوه‌ری به‌ڕێز مالیکی پـێـکهاتووه له هوشیار زێباری وه‌زیری ده‌ره‌وه و سه‌عدون ئه‌لدوله‌یمی وه‌زیری ڕۆشنبیری و هه‌روه‌ها وه‌زیری به‌رگری به وه‌کاله‌ت و خه‌یروڵڵا حه‌سه‌ن بابه‌کر وه‌زیری بازرگانی و هادی ئه‌لعامری وه‌زیری گواستنه‌وه و فه‌لاح ئه‌لفه‌یاز ڕاوێژکاری ئاسایشی نیشـتیمانی.
چاوه‌ڕوان‌ده‌کرێت ڕۆژی چوارشه‌ممه سه‌رۆک ئۆباما له ڕێوڕه‌سمێـکدا له بنکه‌یه‌کی له‌شـکری له نۆرث کارۆلاینا وتارێـک به بۆنه‌ی کشـانه‌وه‌ی ته‌واوی هێزه‌کانی ئه‌مه‌ریکا له عێراق پـێشـکه‌ش بکات. هه‌تا ئێستا ڕوون نیـیه ئایا سه‌رۆک وه‌زیری عێراق ئاماده‌ی ئه‌و ڕێوڕه‌سمه ده‌بێت یان نا.