Accessibility links

ئەڵمانیا تۆڕێـکی داعش لە وڵاتەکەی دەسـتگیردەکات

  • VOA News

پـۆلیسی ئەڵمانیا 5 کەسی دەسـتگیرکردووە بە تاوانی پەیوەندیکردن بە داعشەوە و هەوڵدان بۆ پەیداکردنی خەڵکی تاوەکو بچنە نێو ڕیزەکانی ئەم گروپە تێرۆرستیـەوە.

ئۆفیسی داواکاری گشتی لە بەرلین ئەمڕۆ سێشەممە لە بەیانـنامەیەکدا گوتی ئەم پـێنج تاوانبارە تۆڕێـکیان لە هەرێمەکە پـێکهێنابوو بە ئامانجی پەیداکردنی خەڵکی بۆ داعش و ناردنیان بۆ سوریا تاوەکو ببنە ئەندامی ئەو گروپە.

بەیانـنامەکە دەشڵێت کەسێـکی عێراقی بە ناوی ئەحمەد عەبدولعەزیز عەبدوڵڵا کە تەمەنی 32 سـاڵە سەرۆکایەتی تۆڕەکەی کردبوو و کەسێـکی تورک بە ناوی حەسەن و ئەڵمانیـیەکی بە ڕەچەڵەک سڕبی بە ناوی بۆبان ئەرکیان لە تۆڕەکە فێرکردنی زمانی عەرەبی بووە.

دوو کەسەکەی دیکەی نێو تۆڕەکە کە یەکێـکیان ناوی مەحمودە و ڕەگەزنامەی ئەڵمانی هەیە و ئەوی دیکەیان ناوی ئەحمەدە و خەڵکی وڵاتی کامیرۆنە، بەرپـرس بوون لە ناردنی ئەو کەسانەی فریویان دەدەن.

داواکاری گشتی ئاماژەی بۆ ئەوەش کرد تۆڕەکە توانیبووی بە لایەنی کەم کوڕێـکی گەنج و خێزانەکەی ڕەوانەی سوریا بکەن تاوەکو بچێتە نێو ڕیزگانی داعشەوە.

بەپـێی میدیاکانی ئەڵمانیا 5 کەسەکە دەسـتگیرکراون لە هەردوو هەرێمی سەکسۆنیای خواروو لە باکوری وڵاتەکە و (باکوری ڕاین وستفالیا) لە ڕۆژئاوا.

دەزگای هەواڵگری ئەڵمانیا لە مانگی پـێنج ڕایانگەیاند 820 کەس لە ئەڵمانیاوە پەیوەندیـیان بە گروپە تێرۆرستیـیەکانی ناو عێراق و سوریاوە کردووە، لەوانە نزیکەی یەک لەسەر سێـیان گەڕاونەتەوە و 140 کەسی دیکەیان لەو دوو وڵاتە کوژراون و هێشتا نزیکەی 420 کەسیان هێشتا لەوێ ماونەتەوە.

XS
SM
MD
LG