Accessibility links

ئەفسەرێـکی پـێشووی میسر داوای هێرشکردنە سەر حکومەتی سیسی دەکات

  • VOA News

ئەفسەرێـکی پـێشـووی میسر کە ئێسـتا یەکێـکە لە ڕێبەرانی گروپە توندڕەوەکان و لە لایەن هێزە ئاسایشیـیەکانەوە فەرمانی دەسـتگیرکردنی هەیە، بە توندی هێرشی کردووەتە سەر عەبدولفەتاح ئەلسیسی سەرۆکی میسر و داوایکردووە میسریـیەکان جیهادی لە دژ ڕابگەیەنن.

ماڵپەڕی سایت کە بە دوای هەواڵی گروپە توندەڕەوەکاندا لەسەر ئنتەرنێت دەگەڕێت، ڕۆژی چوارشەممە گوتی لە ماڵپەڕێـکی سەر بە قاعیدە تۆمارکراوەیەکی دەنگی بڵاوکراوەتەوە کە دەڵێن هی هیشام ئەلعەشماویـیە و تیایدا گوتویەتی " فرعەونێـکی نوێ خۆی بەسەر میسردا سەپاندووە ئەویش سیسی‌یە."

پاشان هانی خەڵکی داوە شەڕی حکومەتی سیسی بکەن و گوێ بە ژیانی خۆیان نەدەن. ماڵپەڕەکە دەڵێت لە 20 ی مانگەوە ئەو تۆمارکراوە بڵاوکراوەتەوە بە ناوی ئەبو عومەر ئەلموهاجر ئەلمیسری.

دەزگاکانی ئاسایشی میسر پـێـیان وایە ناوبراو نەخشە داڕێژەری کوشتنەکەی هیشام بەرەکات داواکاری گشـتی میسر بووبێت، ئەوەی مانگی ڕابردوو لە نزیک ماڵەکەی خۆی لە قاهیرە بە تەقینەوەیەک کوژرا.

هیشام ئەلعەشماوی یەکێـکە لەو ئەفسەرانەی پـێشووی میسر کە ئێسـتا لە نێو گروپە تێرۆرستیـیەکاندایە.

دەڵێن ناوبراو لە سـاڵی 2007 ڕەوانەی بەردەم دادگای لەشکری کراوە و ساڵی 2011 لە لەشکر دەرکراوە و لە سـاڵی 2013 ڕۆیشتووە بۆ تورکیا و پاشان بۆ سوریا و لەوێ مەشق و ڕاهێنانی لەسەر چۆنێتی دروسـتکردنی تەقەمەنی کردووە و جارێکی دیکە گەڕاوەتەوە بۆ میسر و بەشداری لە مانگرتنەکانی ڕابعە عەدویـیە کردووە و بە دوایدا بەرەو شاری دوڕنەی لیبیا ڕۆیشتووە و لەوێش لە بنکەکانی قاعیدە مەشق و ڕاهێنانی پـێکراوە.

دەشڵێن بەشداری لە چەندان هێرشی خوێناوی لە دژی لەشکری وڵاتەکەی کردووە. هەروەها هەوڵی کوشتنی وەزیری پـێشووی ناوخۆی میسری داوە.

XS
SM
MD
LG