Accessibility links

هێله‌ری کلنتن: ئه‌مه‌ریکا پـشـتیوانی له‌ خۆپـیشــانده‌رانی ئێرانی ده‌کات

  • David Gollust

وه‌زیری ده‌ره‌وه‌ی ئه‌مه‌ریکا هێله‌ری کلنتن له‌ کۆنگرێس بۆ په‌یامنێران ده‌دوێت، دووشه‌ممه‌ 14 ی دووی 2011

وه‌زیری ده‌ره‌وه‌ی ئه‌مه‌ریکا هێله‌ری کلنتن له‌ کۆنگرێس بۆ په‌یامنێران ده‌دوێت، دووشه‌ممه‌ 14 ی دووی 2011

کاربه‌ده‌سـتانی وڵاته‌ یه‌کگرتووه‌کان توڕه‌یی خۆیان له‌ حکومه‌تی ئێرانی نه‌شاردۆته‌وه‌ سه‌باره‌ت به‌ سه‌رکوتکردنی جودابیران هاوکاتی که‌ حکومه‌تی ئێران سـتایشی خۆی ده‌کات بۆ هاندانی ڕاپه‌ڕینی جه‌ماوه‌ری له‌ میسر و شوێنی دیکه‌ی هه‌رێمه‌که‌.

تێبینی‌یه‌کانی وه‌زیری ده‌ره‌وه‌ی ئه‌مه‌ریکا هێله‌ری کلنتن پاش کۆبوونه‌وه‌یه‌ک له‌ کۆنگرێسی وڵاته‌ یه‌کگرتووه‌کان له‌گه‌ڵ جان بۆینه‌ری سه‌رۆکی ئه‌نجومه‌نی نوێنه‌ران تا ئێسـتا زه‌قترین ئاماژه‌ بووه‌ له‌و باره‌یه‌وه‌.

وه‌زیری ده‌ره‌وه‌ کلنتن پاش ده‌رچوونی له‌ وتووێژێـک له‌سه‌ر بوجه‌ی ئه‌مه‌ریکا له‌گه‌ڵ ڕێبه‌رانی نوێی ئه‌نجومه‌نی نوێنه‌ران گوتی ئه‌مه‌ریکا به‌ ڕوونی و ڕاسته‌وخۆ پـشـتیوانی له‌ خواسـته‌کانی خونیشـانده‌ران له‌ ئێران ده‌کات که‌وا ڕۆژی دووشه‌ممه‌ له‌ لایه‌ن هێزه‌ ئاسیایشیـیه‌کانه‌وه‌ له‌ تاران به‌ شێوه‌یه‌کی توندوتیژی بڵاویان پـێـکرا.

خانم کلنتن گوتی وڵاته‌ یه‌کگرتووه‌کان له‌گه‌ڵ گۆڕانی سیاسی بوو له‌ میسر و هه‌مان شتی بۆ ئێران ده‌وێت. هێله‌ری کلنتن جه‌ختی له‌سه‌ر ئه‌وه‌ کرده‌وه‌ که‌ شتێـکی سه‌یره‌ حکومه‌تی ئێرانی له‌ وڵاتدا خه‌ڵـکی سه‌رکوت ده‌کات و له‌ هه‌مان کاتدا به‌ ده‌م سـتایشی مافی خۆنیشـانده‌ران له‌ شوێنی دیکه‌دا ده‌کات.

هێله‌ری کلنتن ده‌ڵێت " ئه‌وه‌ی که‌ ئه‌مڕۆ له‌ ئێران ده‌یبینین ڕووده‌دات سه‌لماندنی ئازایه‌تی خه‌ڵـکی ئێرانه‌ و تاوانبارکردنێـکی دوو ڕوویی ڕژێمی ئێرانه‌، ئه‌و ڕژێمه‌ی که‌ له‌ ماوه‌ی سێ هه‌فته‌ی ڕابردوو هه‌میشه‌ په‌سنی ڕووداوه‌کانی ناو میسری ده‌دا و ئێسـتا کاتێـک که‌ ده‌رفه‌تی ئه‌وه‌ی هه‌یه‌ هه‌مان مافه‌کان به‌ خه‌ڵـکی خۆی بدات هه‌ر وه‌ک چۆن به‌ ناوی گه‌لی میسره‌وه‌ ئیدیعای ده‌کرد ئه‌وه‌ ناکات. ڕێبه‌رانی ئێرانی به‌م کاره‌یان جارێـکی دیکه‌ سـروشتی ڕاسته‌قینه‌ی خۆیان ده‌رده‌خه‌ن."

دواتر گوته‌بێژی وه‌زاره‌تی ده‌ره‌وه‌ی ئه‌مه‌ریکا پی جه‌ی کراوڵی نیگه‌رانی قوڵی ده‌ربڕی سه‌باره‌ت به‌ ڕاپـۆرتی ڕوودانی کوژراو و بریندار له‌ ئاکامی سه‌رکوتکردنه‌که‌ی تاران و گوتی پـێناسه‌که‌ی هێله‌ری کلنتن بۆ کاردانه‌وه‌ی حکومه‌تی ئێران له‌مه‌ڕ سه‌رکوتکردنی خۆنیشـانده‌ران پـڕ به‌ پـێستی بوو.

پی جه‌ی کراوڵی ده‌ڵێت " هێزه‌ ئاسایشیـیه‌کان خۆنیشـانده‌ران ده‌گرن و لێـیان ده‌ده‌ن و هه‌روه‌ها گازی فرمێسـک ڕێژ دژی خۆنیشـانده‌ران به‌کارده‌هێنن، هه‌روه‌هاش لێناگه‌ڕێن ئامێره‌کانی گواسـتنه‌وه‌ی گشـتی و ته‌له‌فونی ده‌سـتی و ڕێـگاکانی دیکه‌ی په‌یوه‌ندیکردن به‌کاربهێنن."

به‌پـێی ڕاپـۆرته‌کان ئێران له‌سه‌ر به‌ربه‌سـتکردنی ڕوماڵکردنی هه‌واڵه‌کانی وڵاته‌که‌ به‌رده‌وامه‌. هه‌ردوو ڕێبه‌ری سه‌ره‌کی ئۆپـۆزسیۆن له‌ ماڵی خۆیان هه‌ر له‌ ده‌سـتبه‌سه‌ریدان، ئه‌مه‌ش شـان به‌ شـانی شه‌پـۆلێـکی دیکه‌ی گرتنی که‌سایه‌تی ئۆپـۆزسیۆنه‌کانی دیکه‌.

وه‌زیری ده‌ره‌وه‌ی ئه‌مه‌ریکا هێله‌ری کلنتن له‌ تێبینیـیه‌کانی له‌ کۆنگرێسی ئه‌مه‌ریکا و دواتر له‌ وتووێژه‌کانیدا له‌گه‌ڵ که‌ناڵه‌ ئاسـمانیـیه‌کانی سه‌ته‌لایتی عه‌ره‌بی ڕه‌زامه‌ندی ده‌ربڕی له‌سه‌ر ڕۆڵی له‌شـکری میسری که‌وا پاش ده‌سـت له‌کارکێشـانه‌وه‌ی سه‌رۆکی پـێشـووی میسر حوسـنی موباره‌ک به‌رپـرسیارێتیـیه‌کی خراوه‌ته‌ ئه‌سـتۆ که‌ به‌ڕێوه‌بردنی قۆناغی گواسـتنه‌وه‌ی وڵاته‌که‌ بکات بۆ دیموکراسی.

خانم کلنتن گوتی له‌شـکری میسر په‌یڕه‌وی جیدیه‌تی ئامانجه‌که‌ی کردووه‌ و ئه‌و هه‌نگاوانه‌ی که‌ هه‌تا ئێسـتا دانراون جێـگای متمانه‌ و دڵنیاکه‌ره‌وه‌ بوون. به‌ڵام به‌ که‌ناڵی ته‌له‌فیزیۆنی ئه‌لحوڕه‌ی گوت که‌وا وڵاته‌ یه‌کگرتووه‌کان پـشـتیوانی بوجه‌یی دابین ده‌کات، وه‌ هێشـتا ڕێـگایه‌کی دورودرێژ ماوه‌ بـبڕێت و وڵاته‌ یه‌کگرتووه‌کان له‌ نزیکه‌وه‌ چاودێری پـێشـهاته‌کانی میسر ده‌کات.

هێله‌ری کلنتن ده‌ڵێت" به‌ دڵنیایـیه‌وه‌ ئومێدی ئێمه‌ ئه‌وه‌یه‌ که‌وا هه‌موو ئه‌و شـتانه‌ی که‌ به‌ڵێنیان بۆ دراوه‌ وه‌ک کۆتایی‌هێنان به‌ قانونی باری ته‌نگه‌تاوی و ڕیفۆرمکردنی ده‌سـتور و ڕێـگادان به‌ پارته‌ سیاسـیه‌کان و هه‌موو به‌شه‌کانی که‌وا گواسـتنه‌وه‌ی ڕاسته‌قینه‌ بۆ دیموکراسی پـێـکده‌هێنن جێبه‌جێ بکرێن. هه‌روه‌ها ئێمه‌ به‌رده‌وام ده‌بین له‌سه‌ر هه‌ڵوێسـته‌که‌مان بۆ ئه‌م کارانه‌."

هێله‌ری کلنتن به‌ که‌ناڵی ئه‌لحوڕه‌ی گوت که‌وا له‌و باوه‌ڕه‌دایه‌ هه‌نگاونان به‌ره‌و چاکسـازی و ده‌رئه‌نجام هاتنه‌ کایه‌ی دیموکراسی خه‌ریکه‌ به‌دی دێت بۆ هه‌موو وڵاتانی هه‌رێمه‌که‌ که‌ حکومه‌تی زۆرداریان هه‌یه‌. گوتی جێـگای دڵگرانیـیه‌ که‌وا بـبینی وڵاته‌ دۆسته‌کانی ڕۆژهه‌ڵاتی ناوه‌ڕاست نه‌توانن سوود له‌و بارودۆخه‌ وه‌ربگرن.

بابه‌تی په‌یوه‌ندیدار

XS
SM
MD
LG