Accessibility links

له‌ سـاڵی 2010 دا له‌ موسڵ چوار ڕۆژنامه‌وان کوژراوه‌

  • Amir Goran

شـاری موسڵ

شـاری موسڵ

له‌ ماوه‌ی یه‌ک سـاڵی ڕابردوو چوار ڕۆژنامه‌وان ته‌نها له‌ شـاری موسڵ کوژراون، له‌گه‌ڵ ئه‌وه‌ی به‌ به‌راورد له‌گه‌ڵ سـاڵانی تر ڕێژه‌ی کوشـتنی ڕۆژنامه‌نووسان له‌م شـاره‌ که‌می کردووه‌.

به‌ڵام تاکو ئێسـتاش موسڵ به‌ مه‌ترسیدارترین شـار له‌ سه‌رتاسه‌ری عێراق ده‌ژمێردرێت بۆ کاری ڕۆژنامه‌وانی، ئه‌مه‌ش وه‌ک یاسر حه‌مدانی به‌رپـرسی ئۆفیسی موسڵی کۆمه‌ڵی عێراقی بۆ داکۆکیکردن له‌ مافی ڕۆژنامه‌نووسان بۆ ده‌نگی ئه‌مه‌ریکا ده‌ڵێت" له‌ عێراق به‌ گشـتی و له‌ موسڵ به‌ تایبه‌تی ڕۆژنامه‌نووسـان دووچاری کۆمه‌ڵێـک کێشه‌ و گرفت له‌ کاره‌کانیان ده‌بنه‌وه‌. ئێسـتاش موسڵ وه‌کو سـاڵانی تر مه‌ترسیدارترین شـاره‌ بۆ کاری ڕۆژنامه‌نووسـان له‌ سه‌رتاسه‌ری عێراق که‌ ته‌نها له‌ سـاڵی 2010 چوار ڕۆژنامه‌وانی به‌ توانا له‌و شـاره‌ کوژران. به‌ داخه‌وه‌ تاکو ئێسـتاش لایه‌نی به‌رپـرس له‌م شـاره‌ هیچ کارێـکیان نه‌کردووه‌ نه‌ک بۆ پاراسـتنی ڕۆژنامه‌نووسان و نه‌ک بۆ ئاشـکراکردن و ده‌سـتگیرکردنی بکوژانیش. هه‌روه‌ها په‌رله‌مانی عێراقیش تاکو ئێسـتا نه‌یتوانیوه‌ یاسایه‌ک بۆ کاری ڕۆژنامه‌وانی و پاراسـتنی ڕۆژنامه‌نووسان ده‌ربکات. لێره‌دا ده‌توانم بڵێم له‌م شـاره‌ ئه‌گه‌ر ڕۆژنامه‌وان به‌خۆی پارێزگاری له‌ ژیانی خۆی نه‌کات ئه‌وا که‌س نیـیه‌.

سه‌عید مه‌موزینی ڕۆژنامه‌وان ده‌ڵێت هه‌رچه‌نده‌ بارودۆخی ئاسایش له‌م شـاره‌ هه‌ندێـک باشـتر بووه‌، به‌ڵام ڕه‌وشی ڕۆژنامه‌نووسان هه‌ر ناله‌باره‌. ده‌شڵێت ڕۆژنامه‌نووسان که‌ کارده‌که‌ن تووشی کێشه‌ی هه‌ره‌ گه‌وره‌ ده‌بنه‌وه‌، چونکه‌ گۆڕه‌پانی موسڵ گۆڕه‌پانێـکی گه‌رمه‌، ته‌قه‌ و ته‌قینه‌وه‌ و ڕفاندن و کێشه‌ی جۆراوجۆری لێـیه‌، هه‌رچه‌نده‌ ئێسـتا جۆرێـک له‌ ئارامی باشـتری پـێوه‌ دیاره‌، به‌ڵام زۆر ڕۆژنامه‌نووس له‌ موسڵ کوژران و شه‌هیدکران. هه‌رچه‌نده‌ ئێسـتاش ژماره‌یه‌کی باشی ڕۆژنامه‌ له‌ موسڵ ده‌رده‌چێت سه‌ره‌ڕای ئه‌و ڕه‌وشه‌ ناخۆشه‌، نه‌یانتوانیوه‌ ڕێـگه‌ له‌ ڕۆژنامه‌نووسـان بگرن. وا دیاره‌ ڕۆژنامه‌نووسانیش مرۆڤی گیان له‌سه‌ر ده‌سـتن و له‌خۆ بردوون له‌ هه‌موو ڕه‌وشه‌کان ده‌یانه‌وێت ڕاسـتیـیه‌کان بۆ دیدی گشـتی بگوێزنه‌وه‌.

شـایانی باسه‌ له‌ سه‌ره‌تای پـرۆسه‌ی ئازادی عێراق له‌ سـاڵی 2003 تاوه‌کو ئێسـتا نزیکه‌ی 40 ڕۆژنامه‌وان ته‌نها له‌ شـاری موسڵ کوژراون، به‌مه‌ش شـاره‌که‌ به‌ مه‌ترسیدارترین شـار له‌سه‌رتاسه‌ری عێراق ده‌ژمێردرێت بۆ کاری ڕۆژنامه‌وانی.

دوایـین جاریش ڕۆژنامه‌وان مازن به‌غدادی کارمه‌ندی که‌ناڵی ئه‌لموسڵیـیه‌ 24 ڕۆژ به‌ر له‌ ئێسـتا له‌ ماڵه‌که‌ی خۆی له‌ ناوه‌ڕاستی شـاری موسڵ کوژرا.

ده‌توانن گوێبیسـتی ده‌قی ڕاپـۆرته‌كه‌ بن له‌ ڕێـگه‌ی كلیـكـكردنی ئه‌و فایله‌ ده‌نـگیـیانه‌ی سه‌ره‌وه‌ی ده‌سته‌ چه‌پ، ماوه‌كه‌ی 2:46 خوله‌كه‌.

بابه‌تی په‌یوه‌ندیدار

XS
SM
MD
LG