Accessibility links

هه‌لیکۆپته‌رێـکی تورکی له‌ ئه‌فغانسـتان ده‌که‌وێته‌ خوارێ و 14 که‌س ده‌مرن

  • VOA News

به‌رپـرسـانی له‌شـکری تورکی ده‌ڵێن یه‌کێـک له‌ هه‌لیکۆپـته‌ره‌کانیان له‌ ده‌ره‌وه‌ی کابولی پایته‌ختی ئه‌فغانسـتان به‌سه‌ر ماڵێـکدا که‌تووه‌ته‌ خواره‌وه‌ و ده‌رئه‌نجام 12 سه‌ربازی تورکی سه‌رنشینانی نێو فڕۆکه‌که‌ گیانیان له‌ده‌ستداوه‌ و هه‌روه‌ها به‌ لای که‌م 2 که‌سیش له‌ شوێنی ڕووداوه‌که‌دا مردوون.

سه‌باره‌ت به‌ ڕووداوه‌که‌ به‌رپـرسـانی تورکی ده‌ڵێن هه‌لیکۆپـته‌ره‌که‌ له‌ جۆری Sikorsky بووه‌ و وه‌ک به‌شێـک له‌ هێزه‌کانی هاوپه‌یمانی ناتۆ سه‌رگه‌رمی ئه‌نجامدانی کاری سه‌ربازی بووه‌ له‌و ده‌مه‌ی ئه‌مڕۆ له‌ ناوچه‌ی باگرامی سه‌ر به‌ پارێزگای کابول که‌وتۆته‌ خواره‌وه‌.

هه‌ر له‌و باره‌یه‌وه‌ ئه‌حمه‌د داوود ئۆغڵوی وه‌زیری ده‌ره‌وه‌ی تورکیا گوتی هه‌لیـکۆپـته‌ره‌که‌ له‌و ده‌مه‌ی هه‌وڵی نیشـتنه‌وه‌یه‌کی ته‌نگه‌تاوی دابووه‌ به‌ربووه‌ته‌وه‌ و به‌ په‌یامنێرانیشی گوت ڕووداوه‌که‌ دڵته‌زێنه‌ و په‌ژاره‌یه‌کی زۆری له‌ دڵماندا خولقاند.

ئه‌وه‌ی شـایه‌نی گوتنه‌ به‌رپـرسـانی ئه‌فغانی ده‌ڵێن به‌هۆی به‌ربوونه‌وه‌ی هه‌لیکۆپـته‌ره‌که‌ به‌سه‌ر ماڵێـکدا 2 منداڵیش گیانیان له‌ده‌سـتداوه‌.

هاوکات به‌رپـرسـانی هێزه‌کانی ناتۆ له‌و باره‌یه‌وه‌ ده‌ڵێن لێـکۆڵینه‌وه‌ له‌ هۆکاری که‌وتنه‌خواره‌وه‌ی هه‌لیـکۆپته‌ره‌که‌ ده‌کرێت و ڕاپـۆرتی به‌رایی په‌یوه‌ست ئاماژه‌ی ئه‌وه‌ ده‌دات که‌ له‌ ده‌می که‌وتنه‌خواره‌وه‌ی هه‌لیـکۆپـته‌ره‌که‌ هیچ چالاکیـیه‌کی دوژمنکارانه‌ له‌ ناوچه‌که‌دا نه‌بووه‌.

ئه‌وه‌ی جێی ئاماژه‌یه‌ تورکیا نزیکه‌ی 1800 سه‌ربازی له‌ ئه‌فغانسـتاندا هه‌یه‌ وه‌ک به‌شێـک له‌ هێزه‌کانی ناتۆ له‌و وڵاته‌دا.

XS
SM
MD
LG