Accessibility links

لوتکه ی گروپی هه شت ووڵاتانی پیشه سازی کۆتایی پێهات


لوتکه‌ی گروپی هه‌شت ووڵاتانی پیشه‌سازی سکۆتلاندا کۆتایی پێهات. لوتکه‌که‌ به‌ ڕێکه‌وتن له‌سه‌ر یارمه‌تیدانی ئه‌فریکا و فه‌له‌ستین و به‌ڵێندان به‌ چاره‌سه‌رکردنی کێشه‌ی گه‌رم بوونی گۆی زه‌مین کۆتایی هات. ڕێبه‌رانی به‌شداربوو له‌ لوتکه‌که پێکه‌وه‌ هێرشه‌ تیرۆرستیه‌کانیان مه‌حکوم کرد و یه‌کگرتوویی خۆیان نیشاندا. ئه‌ندامانی لوتکه‌که‌ ده‌ریانخست، ئه‌گه‌ر زوو کۆتاییان به لوتکه‌که بهێنایه‌ ئه‌وا ته‌نها سوودی به‌و که‌سانه ده‌گه‌یاند که ده‌یان که‌سی بێگوناهی سیڤیڵیان له پایته‌ختی به‌ریتانیا کوشتووه‌. سه‌رۆک وه‌زیرانی به‌ریتانی تۆنی بلێر هه‌رده‌م هه‌وڵی ده‌دا کۆبوونه‌وه‌کان به‌ سه‌رکه‌وتوویی به‌ڕێوه‌ بچێت، به‌ڵام ناچار بوو بۆ ماوه‌ی چه‌ند کاتژمێرێک شوێنی کۆبونه‌وه‌که جێهێڵێت و به‌ره‌و له‌نده‌ن بگه‌ڕێته‌وه‌ تاوه‌کو له نزیکه‌وه‌ ته‌ماشای ئه‌و زیانانه‌ بکات که‌ که‌وتۆته‌وه‌ و دڵنه‌وایی قوربانیه‌کان بکات.
وه‌زیری ده‌ره‌و‌ی به‌ریتانیاش جاک سترۆ له جیاتی به‌ڕێز بلێر ئاماده‌ی کۆبوونه‌وه‌که بوو و چاودێری ووتوێژه‌کانی ده‌کرد که‌ هه‌ر له بابه‌تی ئابوری و گه‌رم بوونی گۆی زه‌وی گرتبووه‌ هه‌تاوه‌کو کێشه‌ ناوچه‌ییه‌کانی وه‌ک عێراق و ئێران. به‌ڵام ئاشکرایه‌ که‌وا ته‌قینه‌وه‌کانی له‌نده‌ن کاریگه‌رییه‌کی دیاری له‌سه‌ر لوتکه‌که‌ هه‌بوو ، به‌وه‌ی دڵگرانی و توڕه‌یی و له هه‌مان کاتدا خۆڕاگری به‌ هه‌موو ئه‌ندامه‌کانیه‌وه‌ دیار بوو.

سه‌رۆک وه‌زیرانی به‌ریتانیش تۆنی بلێر له ماوه‌ی ووتارێکی نیشتمانیدا به‌ڵێنی به‌ دۆزینه‌وه‌ی ئه‌و تیرۆرستانه دا که له پشته‌وه‌ی ئه‌و کاره‌ توند و تیژییانه‌وه‌ بوون. به‌ڕێز بلێر گوتی" بێ گومان، پۆلیس و ئاسایش به‌ شێوه‌یه‌کی چڕتر کار ده‌که‌ن تاوه‌کو به‌رپرسانی ئه‌و هێرشانه‌ بدرێته‌ ده‌ست دادگا." هه‌روه‌هابه‌ڕێز بلێر گوتی ئه‌و ته‌قینه‌وانه‌ له‌ لایه‌ن چه‌ند که‌سانێکه‌وه‌ به‌ ناوی ئیسلامه‌وه‌ جێبه‌جێ کراوه. به‌ڵام زۆر به‌ خێرایی گوتیشی که‌وا زۆربه‌ی موسوڵمانان دژی ئه‌و جۆره‌ توند و تیژییه‌ن. هه‌روه‌ها گوتیشی تیرۆرستان هه‌وڵده‌ده‌ن خه‌ڵکی بێ گوناه بترسێنن و فشاریان ده‌خه‌نه‌ سه‌ر چۆنێتی ژیانیان بگۆڕن، به‌ڵام ئه‌وانه‌ جارێکی تر له‌وه‌دا سه‌رنه‌که‌وتن.

له کۆتاییدا، سه‌رۆک وه‌زیرانی به‌ریتانی پرسه‌ و سه‌ره‌خۆشی خۆی ئاڕاسته‌ی خێزانی قوربانیه‌کان کرد و گوتی گه‌لی به‌ریتانی به‌‌ به‌هێزی ڕاسته‌قینه‌و بێده‌نگیه‌که‌یان سه‌لماندییان که‌وا به‌هاکانیان سه‌رده‌که‌وێت و ئه‌وان خۆڕاگرن.

XS
SM
MD
LG