كاربده‌ستێت له‌شكرێ ئه‌مریكی دبێژن په‌قینه‌كا مه‌زن ڕوی دا و بۆمبه‌ك هاته په‌قاندن ده‌مێ كاروانه‌كێ له‌شكرێ ئه‌مریكی پشتی نیڤرۆ لوێرێ ده‌رباز دبو. ل سه‌ر زارێ دیده‌ڤانا هاته ڤه‌گێران دبێژن بكێمی ڤه ئاگر به‌ر ببو ئۆتۆمبێله‌كێ و هنده‌كێت دبێژن په‌قینه‌كا دی قه‌ومی ده‌مێ هێزێت پشته‌ڤانیێ دگه‌هیشتن. باژێرۆكێ خالدیه دكه‌ڤیته ده‌ڤه‌را كو دبێژنێ سێگۆشه‌یا سنی كو پڕانیا هێرشا دژی هێزێت هه‌ڤالبه‌ندا لوێرێ تێنه كرن. ل ڕۆژا شه‌مبیا بۆری ب په‌قینا ئوتومبێله‌كا بومبه‌كری سێ سه‌ربازێت ئه‌مریكی هاتنه كوشتن و شه‌ش بریندار بون دگه‌ل ژماره‌كا عێراقیێت سڤیل. ل جهێت دی له‌شكرێ ئه‌مریكی دبێژت سێ عێراقی هاتنه كوشتن د هێرشه‌كێ دا ل باژێرۆكێ بێجی یا باكوورا باژێرێ لدایك بونا سه‌دام حسینی (تكریت). له‌شكر دبێژت هه‌ر سێ كه‌س به‌رگومان بون ب ئه‌ندامیا كۆمه‌ڵه‌كێ كو هێرشا دكه‌نه سه‌ر هێزێت هه‌ڤالبه‌ندا.