Accessibility links

کاربه‌ده‌سـتانی ئه‌فغانسـتان پـێشـبینی ده‌که‌ن ئه‌نجامی هه‌ڵـبژاردنی سه‌رۆکایه‌تی هه‌فته‌ی داهاتوو ڕابگه‌یه‌نرێت


کاربه‌ده‌سـتانی ئۆفیسی هه‌ڵـبژاردنه‌کانی ئه‌فغانسـتان ده‌ڵێن کارمه‌نده‌کانیان خه‌ریـکی ژماردنه‌وه‌ی ده‌نگی هه‌ندێـک له‌ سـندوقه‌کانی هه‌ڵـبژاردنه‌ سه‌رۆکایه‌تیـیه‌که‌ی 20 ی مانگی هه‌شتن ئه‌وه‌ی ناکۆکی له‌سه‌ر که‌وتۆته‌وه‌. ده‌شڵێن پـێویسته‌ ئه‌نجامه‌کان یه‌کلابکرێته‌وه‌ تا له‌ کۆتایی هه‌فته‌ی داهاتوودا به‌ فه‌رمی ناوی براوه‌ ڕابگه‌یه‌نرێت.

ناکۆکیـیه‌کان له‌سه‌ر ئه‌وه‌ دروسـتبوون که‌ ده‌ڵێن فرت و فێڵ له‌ پـرۆسه‌ی ده‌نگدانه‌که‌دا کراوه‌. چاودێرانی سه‌ربه‌خۆی گوتوویانه‌ یه‌ک له‌سه‌ر سێی ده‌نگه‌کان گومانیان له‌سه‌ره‌. به‌پـێی ئه‌نجامه‌ نافه‌رمیـیه‌کان سه‌رۆک حامید کارزای له‌ سه‌دا 54 ی ده‌نگه‌کانی به‌ده‌ستهێناوه‌. ئه‌گه‌ربێت و بۆ ژێر له‌سه‌دا 50 ده‌نگه‌کانی بێته‌ خوارێ ئه‌وا گه‌ڕی دووه‌می ده‌نگدان سـازده‌کرێت و تیایدا کارزای ڕووبه‌ڕووی عه‌بدوڵڵا عه‌بدوڵڵای ڕکابه‌ری سه‌ره‌کی ده‌بێته‌وه‌.

ڕۆژی دووشه‌ممه‌ جێـگری به‌ڕێوه‌به‌ری ئۆفیسی هه‌ڵـبژاردنه‌کانی ئه‌فغانسـتان به‌ په‌یامنێرانی گوت سه‌رله‌نوێ ژماردنه‌وه‌که‌ چه‌ند ڕۆژێـک ده‌خایه‌نێت و پـێویسـته‌ ئه‌نجامی کۆتایی تا کۆتایی هه‌فته‌ی داهاتوو ئاماده‌بێت.

ئه‌م ناکۆکیـیه‌ی له‌سه‌ر ژماردنی ده‌نگه‌کان که‌وتۆته‌وه‌ له‌ کاتێـکدا دێت که‌ به‌ڕێوه‌به‌رایه‌تی سه‌رۆک ئۆباما پـیاداچوونه‌وه‌یه‌کی فراون بۆ ته‌واوی سـتراتیژیـیه‌تی شه‌ڕ له‌و وڵاته‌ ده‌کات.

له‌ ڕۆژی شه‌ممه‌وه‌ 10 سه‌ربازی ئه‌مه‌ریکی له‌ ئه‌فغانسـتاندا کوژراون، له‌وانه‌ هه‌شـتیان له‌ هێرشی سه‌دان چه‌کدار بۆ سه‌ر دوو مۆڵه‌گه‌ی سه‌ربازی کوژراون له‌ ناوچه‌یه‌کی گوندنشینی هه‌رێمی وه‌زیرسـتاندا.

XS
SM
MD
LG