Accessibility links

بان کی موون سه‌ردانی ئه‌فغانسـتان و پاکسـتان ده‌کات


ڕۆژی چوارشه‌ممه‌ سـکرتێری گشـتی نه‌ته‌وه‌ یه‌کگرتووه‌کان بان کی موون گه‌یشـته‌ ئیسـلام ئابادی پایته‌ختی پاکسـتان بۆ سـازدانی وتووێـژ له‌گه‌ڵ ڕابه‌رانی پاکسـتاندا.

پـێشـبینی ده‌کرێت سـکرتێری گشـتی نه‌ته‌وه‌ یه‌کگرتووه‌کان لێـکۆڵینه‌وه‌ی فه‌رمی نه‌ته‌وه‌ یه‌کگرتووه‌کان ڕابگه‌یه‌نێت سه‌باره‌ت به‌ کوشـتنی سه‌رۆک وه‌زیرانی پـێشـووتری پاکسـتان خانم بێنه‌زیر بۆتۆ.

سـاڵی ڕابردوو ده‌رئه‌نجامی لێـکۆڵینه‌وه‌ی ده‌زگاکانی پاکسـتان وای نیشـان دا که‌ میلیتانه‌کانی تالیبان به‌رپـرس بوون له‌ کوشـتنی خانم بۆتۆ له‌ مانگی دوانزه‌ی سـاڵی 2007 دا، به‌ڵام پارته‌ سـیاسـیـیه‌که‌ی ده‌ڵێت ڕه‌نگه‌ ڕکه‌به‌رانی سـیاسی خانم بۆتۆ ڕۆڵیان له‌و ڕووداوه‌دا هه‌بووبێت.

هاوکات هه‌ر ڕۆژی چوارشه‌ممه‌ به‌ڕێز بان کی موون سه‌ردانێـکی ناچاوه‌ڕوان‌کراوی بۆ کابولی پایته‌ختی ئه‌فغانسـتان سـازدا، له‌وێ له‌گه‌ڵ سه‌رۆکی ئه‌فغانیدا کۆبوونه‌وه‌ی سـازدابوو.

له‌ کۆنفرانسـێـکی ڕۆژنامه‌وانیدا سـکرتێری گشـتی نه‌ته‌وه‌ یه‌کگرتووه‌کان ڕایگه‌یاند سه‌ردانه‌که‌ی نیشـانه‌ی بایه‌خدانی نه‌ته‌وه‌ یه‌کگرتووه‌کان به‌ ئه‌فغانسـتان و داوای هاوکاریـیه‌کی به‌رفراونتری کرد له‌ نێوان ده‌سه‌ڵاتدارانی له‌شـکری و مه‌ده‌نیدا له‌ پـێناو که‌مکردنه‌وه‌ی ژماره‌ی کوژراوانی سـڤیل.

له‌ لای خۆیه‌وه‌ سه‌رۆکی ئه‌فغانسـتان حامید کارزای داواکاری بۆ هێزه‌ فره‌ نه‌ته‌وه‌یی‌یه‌کان دووپات کرده‌وه‌ بۆ خۆلادان له‌ کوشـتنی خه‌ڵـکی سـڤیل له‌ میانه‌ی هه‌ڵـمه‌ته‌ له‌شـکریـیه‌کانیاندا. گوتیشی ئه‌و جۆره‌ کوشـتنانه‌ ئاسـتی گرژی له‌ نێوان ئه‌فغانسـتان و ئه‌مریکادا زیادکردووه‌.

پاش ئه‌و کۆنفرانسه‌ به‌ڕێز بان به‌ره‌و ئیسلام ئابادی پایته‌ختی پاکسـتان به‌ڕێـکه‌وت بۆ ئه‌وه‌ی له‌گه‌ڵ ڕابه‌رانی ئه‌و وڵاته‌دا کۆبوونه‌وه‌ سـازبدات.

بابه‌تی په‌یوه‌ندیدار

XS
SM
MD
LG