Accessibility links

وه‌زیری ده‌ره‌وه‌ی به‌ریتانیا هیواداره‌ له‌ سـاڵی 2009 گۆڕانکاری له‌ خۆرهه‌ڵاتی ناوه‌ڕاسـتدا ڕووبدات


دیـپـلۆماتێـکی باڵای به‌ریتانی ده‌ڵێت هیوادارم سـاڵی ئاینده‌ بـبێته‌ ده‌رفه‌تێـک بۆ هێنانی گۆڕانکاری له‌ خۆرهه‌ڵاتی ناوه‌ڕاسـتدا.

وه‌زیری ده‌ره‌وه‌ی به‌ریتانی ده‌یڤد میلیباند ڕۆژی چوارشه‌ممه‌ دوای وتووێـژکردنی له‌گه‌ڵ میشـێـل سـوله‌یمانی سه‌رۆکی لوبنانی له‌ به‌یرووت ئه‌م لـێدوانه‌ی ڕاگه‌یاند.

له‌ وته‌که‌یدا به‌ڕێز میلیباند گوتی سـاڵی 2009 ده‌بێته‌ سـاڵێـکی گۆڕانکاری له‌ سه‌رانسه‌ری جیهاندا له‌به‌ر ئه‌وه‌ی وڵاته‌ یه‌کگرتووه‌کانی ئه‌مریکا سه‌رۆکێـکی نوێی ده‌بێت و هه‌روه‌ها هه‌ڵـبژاردن له‌ ئیسرائیل و لوبنان و ئێران سـازده‌کرێن.

هاوکات له‌ درێژه‌ی وته‌که‌یدا وه‌زیری ده‌ره‌وه‌ی به‌ریتانی پـشـتگیری خۆی بۆ سه‌ربه‌خۆیی لوبنان و دیموکراسی ده‌ربڕی.

ئه‌وه‌ی شـایانی گوتنه‌ به‌ر له‌وه‌ی به‌ڕێز ده‌یڤد ملیباندی وه‌زیری ده‌ره‌وه‌ی به‌ریتانی ڕۆژی چوارشه‌ممه‌ بگاته‌ به‌یرووت ناوبراو سه‌ردانی سوریا و ئیسرائیل و که‌ناری خۆرئاوای کردبوو، ئه‌مه‌ش وه‌ک به‌شـێـک له‌ گه‌شـته‌که‌ی بۆ خۆرهه‌ڵاتی ناوه‌ڕاست.

دوای ئه‌وه‌ی ڕۆژی سێشه‌ممه‌ له‌ دیمه‌شق له‌گه‌ڵ سه‌رۆکی سـوریا به‌شـار ئه‌لئه‌سه‌د کۆبۆوه‌ وه‌زیری ده‌ره‌وه‌ی به‌ریتانی گوتی سـوریا ده‌توانێت له‌ به‌رقه‌راری و سه‌قامگیری خۆرهه‌ڵاتی ناوه‌ڕاستدا ڕۆڵێـکی بنیادنه‌ر بـبینێت. هاوکات داوای له‌ کاربه‌ده‌سـتانی سـوریایـیش کرد درێژه‌ به‌ وتووێـژی ڕاسـته‌وخۆی ئاشـتی له‌گه‌ڵ ئیسـرائیلدا بده‌ن.

بابه‌تی په‌یوه‌ندیدار

XS
SM
MD
LG