Accessibility links

خه‌رجی كڕیاران له‌ ئه‌مریكا دابه‌زیوه‌ و ڕوسـیا داوای چاكسـازی دارایی ده‌كات


ڕه‌وشی ئابووری ڕۆژی هه‌ینی به‌ڵـگه‌ی زیاتری قه‌یرانی ئابووری جیهانی به‌ ڕووخسـاره‌وه‌ دیاربوو.

له‌و باره‌یه‌وه‌ وه‌زاره‌تی بازرگانی وڵاته‌ یه‌كگرتووه‌كانی ئه‌مریكا ڕایگه‌یاند بڕی خه‌رجكردنی كڕیاران له‌ ماوه‌ی مانگی نۆی ڕابردوودا گه‌وره‌ترین نزمبوونه‌وه‌ی له‌ ماوه‌ی چوار سـاڵدا به‌خۆوه‌ بینی.

هه‌روه‌ها قه‌یرانی دارایی جیهانی بۆته‌ مایه‌ی ئه‌وه‌ی كڕیاران له‌ ئه‌ڵمانیا كه‌ به‌هێزترین ئابووری هه‌یه‌ له‌ نێو وڵاتانی ئه‌وروپادا دوودڵ بن له‌ خه‌رجكردنی پاره‌ و كڕینی كاڵا و پـێداویسـتیـیه‌كانیان.

له‌و باره‌یه‌وه‌ لـێـپـرسـراوانی ئه‌ڵمانی ده‌ڵێن ڕێژه‌ی فرۆشـتنی كاڵای تاك له‌ مانگی نۆدا به‌ ڕێژه‌ی پـتر له‌ سه‌دا دوو كه‌مبۆته‌وه‌. ئه‌مه‌ش جیاوازیـیه‌كی گه‌وره‌یه‌ به‌ به‌راورد له‌گه‌ڵ مانگی هه‌شـتی ئه‌مسـاڵدا كه‌ تێدا فرۆشـتنی كاڵای تاك به‌ هه‌مان ڕێژه‌ واته‌ له‌ سه‌دا دوو به‌رزبووبۆوه‌.

ڕۆژی هه‌ینی سه‌رۆكی ڕوسـیا دمیتری مێدڤێدێڤ گوتی سـیسـتمی دارایی جیهانی پـێویسـتی به‌ چاوپـیاخشـاندنه‌وه‌ هه‌یه‌. هه‌روه‌ها له‌ درێژی وته‌كه‌یدا به‌ڕێز مێدڤێدێڤ گوتیشی ده‌بێت سـیسـتمێـكی نوێی دارایی جیهانی مه‌ترسـیـیه‌كانی به‌ڕێوه‌بردن كه‌مبكاته‌وه‌ و هه‌روه‌ها كه‌متریش پـشـت به‌ دۆلاری ئه‌مریكایی وه‌ك دراو بـبه‌سـتێـت.

ئه‌وه‌ی شـایانی باسه‌ ڕۆژی شه‌ممه‌ بانكی ناوه‌ندی هیندسـتان ڕێژه‌ی سوودی كه‌مكرده‌وه‌ و ئه‌ویش چووه‌ پاڵ بانكه‌ ناوه‌ندیـیه‌كانی ژاپـۆن، ئه‌وانه‌ی پـێشـتر ڕێژه‌ی سـوودیان كه‌مكردبۆوه‌.

هاوكات هه‌ر ڕۆژی شه‌ممه‌ بازاڕی بۆرسه‌ی شـانشینی سـعودی كه‌ گه‌وره‌ترین بازاڕی بۆرسه‌یه‌ له‌ نێو جیهانی عه‌ره‌بیدا به‌ ڕێژه‌ی له‌ سه‌دا سێ به‌رزبۆوه‌.

نزمكردنه‌وه‌ی ڕێژه‌ی سـوودی سه‌ر قه‌رز كاری بازرگانان ئاسـان تر ده‌كات تا بتوانن بۆ كڕینی پـێداویسـتی و هه‌روه‌ها فراوانكردنی كاره‌كانیان و به‌ كرێـگرتنی كارمه‌ندانی نوێ بۆ ئه‌و مه‌به‌سـته‌ پاره‌ به‌ قه‌رز له‌ بانكه‌كان وه‌ربگرن.

بابه‌تی په‌یوه‌ندیدار

XS
SM
MD
LG