Accessibility links

فڕۆکه‌کانی تورکیا شـوێنی سه‌رهه‌ڵـداوانی کورد له‌ باکوری عێراق بۆردومان ده‌که‌ن


جه‌نه‌ڕاڵـێـکی تورکی ده‌ڵێت فڕۆکه‌ جه‌نگیـیه‌کانی تورکیا بۆردومانی 16 ئامانجی گومان‌لێـکراوانی سه‌رهه‌ڵـداوانی کوردیان له‌ باکوری عێراق کردووه‌.

له‌و باره‌یه‌وه‌ جه‌نه‌ڕاڵ مه‌تین گۆراک ڕۆژی هه‌ینی ڕایگه‌یاند ڕۆژی پـێـنجشه‌ممه‌ ئه‌و ئامانجانه‌یان له‌ چـیای قه‌ندیلی نێو عێراق بۆمبـباران کردبوو.

هاوکات چه‌کدارانی پارتی کرێـکارانی کوردسـتانی ناسـراو به‌ په‌که‌که‌ هێرشه‌کانی فڕۆکه‌ جه‌نگیـیه‌کانی تورکیایان پـشـتڕاسـتکرد و ده‌ڵێن له‌و هێرشانه‌دا یه‌ک چه‌کداریان برینداربووه‌.

هه‌ر له‌و باره‌یه‌وه‌ ئه‌نکه‌ره‌ ده‌ڵێت جوداخوازانی په‌که‌که‌ له‌ باکوری عێراقه‌وه‌ هێرش ده‌که‌نه‌ سه‌ر تورکیای هاوسێ. له‌ ماوه‌ی ئه‌مسـاڵدا له‌شـکری تورکیا چه‌ندان هێرشی ئاسـمانی ئه‌نجام داوه‌ و هه‌روه‌ها سـنووری باکوری عێراقی به‌زاندووه‌ و هێرشی کردۆته‌ سه‌ر بنکه‌کانی پارتی کرێـکارانی کوردسـتان له‌ نێو خاکی عێراقدا.

حکومه‌تی عێراقیش له‌شـکرکێشـی تورکیای بۆ سه‌ر باکوری عێراق سه‌رزه‌نشـتکردووه‌ و به‌ پـێشـێـلکاری بۆ سه‌روه‌ری خاکی عێراقی ناودێرکردووه‌.

سه‌باره‌ت به‌م بۆردومانه‌ی تورکیا په‌یامنێری ده‌نگی ئه‌مریکا له‌ شـاری سلێمانی له‌تیف نێروه‌یی ڕاپـۆرتی ناردووه‌، ده‌توانن گوێبیسـتی بن له‌ ڕێـگه‌ی کلیـکـکردنی ئه‌و فایله‌ ده‌نگیـیه‌ی سه‌ره‌وه‌، ماوه‌که‌ی 1:36 خوله‌که‌.

XS
SM
MD
LG