Accessibility links

سـانت پـۆڵ ئاماده‌یه‌ بۆ كۆنگره‌ی نیشتیمانی كۆماریـیه‌كان

  • Michael Bowman

كاربه‌ده‌سـتانی شـاری سـانت پـۆڵی سـتانی مینه‌سـۆتا ده‌ڵێن ئه‌وان به‌ ته‌واوه‌تی شـاره‌كه‌یان ئاماده‌كردووه‌ بۆ له‌خۆگرتنی كۆنگره‌ی نیشـتیمانی كۆماریـیه‌كان، ده‌شـڵێن هیواداران ئه‌م كۆنگره‌ چوار ڕۆژیـیه‌ بـبێته‌ ڤیسـتڤاڵـێـك و سـوودێـكی ئابوری بۆ شـاره‌كه‌یانی لێـبكه‌وێته‌وه‌.
په‌یامنێری ده‌نگی ئه‌مریكا مایكڵ بۆمه‌ن له‌ شـاری سـانت پۆڵ ڕاپـۆرتێـكی له‌و باره‌یه‌وه‌ ناردووه‌ و هاوكارمان موعته‌به‌ر شـیروانی به‌ كوردی ئاماده‌ی كردووه‌.

وه‌ك زۆربه‌ی به‌شـه‌كانی ئه‌مریكا مینه‌سـۆتا ئابوری له‌سه‌رخۆ بووه‌ به‌ درێژایی سـاڵی ڕابردوو. له‌ بازاڕێـكی سـانت پـۆڵ زێڕفرۆشـێـك كه‌ خۆی ته‌نها به‌ حه‌مید ناسـاند ده‌ڵێت هیواداره‌ گه‌شه‌ی بازرگانی بێته‌ دی له‌ كاتی كۆنگره‌ی نیشـتیمانی كۆماریـیه‌كان كه‌ به‌ ده‌یان هه‌زار گه‌ڕیله‌ بۆ ناوچه‌كه‌ ده‌هێنێت.

" به‌ له‌به‌ر چاوگرتنی باری ئابوری شـتێـكی زۆر چاكه‌ خه‌ڵـكێـكی زۆر بێنه‌ ئێره‌، جارێ نازانین ئایا پاره‌ خه‌رج ده‌كه‌ن یان نا. به‌ ڕای من هه‌ر جۆره‌ دیتنێـك له‌و جوته‌ شـاره‌ [ مینیاپڵس و سـانت پـۆڵ]شـتێـكی چاكه‌."

هه‌ر وه‌ك له‌ زۆربه‌ی ناوچه‌ شـارنشـینه‌كان له‌ ئه‌مریكا دیموكراته‌كان ژماره‌یان زۆر زیاتره‌ له‌ كۆماریـیه‌كان له‌ سانت پـۆڵ و شـاری دراوسێ مینیاپڵس كه‌ به‌ لیبرالترین شـار ده‌ناسـرێن له‌ ویلایه‌تێـك كه‌ له‌وه‌تای 1972 وه‌وه‌ له‌ هه‌ڵـبژاردنی سه‌رۆكایه‌تی ده‌نگی بۆ كۆماری نه‌داوه‌.

كاثی گره‌یدی كه‌ له‌ پـێناو خوێـنده‌واركردنی گه‌وران خه‌بات ده‌كات له‌ سـانت پـۆڵ ناڕه‌زایه‌تی خۆی به‌رامبه‌ر به‌ كۆماریـیه‌كان نیشـان ده‌دات، به‌ڵام ده‌شـڵێت هیواداره‌ هه‌رێمه‌كه‌ له‌و كۆنگره‌یه‌ خێر بـبینێت.

" من دیموكراتم من دیموكراتێـكی ته‌واوم ده‌خوازم بـچمه‌ شـوێنی كۆنگره‌كه‌ و هه‌ندێ ڕه‌خنه‌ ده‌ربڕم، یانیش به‌ لانی كه‌م چاو له‌ هه‌ندێ كه‌س سـوور هه‌ڵـگێڕم."

گره‌یدی به‌ ته‌نیا نیـیه‌ كه‌ بیه‌وێت ناڕه‌زایه‌تی ده‌ربڕێت. چاوه‌ڕێ ده‌كرێت زیاتر له‌ دوازده‌ كۆمه‌ڵ و ڕێـكخراو و هه‌روه‌ها سـه‌دان هاوڵاتی سه‌ربه‌خۆ له‌ ڕۆژانی داهاتوو خۆپـیشـاندان بكه‌ن. میكائیل ڕۆدۆڵف هاو دامه‌زرێنه‌ری ڕێـكخراوی "Impeach for Peace" كه‌ ڕێـكخراوێـكی لایه‌نگری مافه‌ مه‌ده‌نیـیه‌كانه‌، ئه‌و ده‌ڵێت هیواداره‌ بكرێت پـێشـی توندوتیژی بگیرێت.

" ئێمه‌ پـێمان خۆشه‌ خۆپـیشـاندانه‌كه‌ شـتێـك بێت له‌سه‌ر بنه‌مای خێزانی تا بتوانین منداڵه‌كانیشمان بهێنین. كۆمه‌ڵی ئاژاوه‌چی هه‌ن كه‌ به‌نیازن شـته‌كه‌ به‌ پـێچه‌وانه‌بێت."

كاربه‌ده‌سـتانی خۆجێی‌یش له‌ نیگه‌رانیـیه‌دا هاوبه‌شـن.

هه‌روه‌ك له‌ دێنڤه‌ر كه‌ هه‌فته‌ی ڕابردوو میواندارێتی كۆنگره‌ی نیشـتیمانی دیموكراته‌كانی كرد، كاربه‌ده‌سـتان لێره‌ به‌ نیازن خۆپـیشـانده‌ران له‌ شـوێنێـكی تایبه‌تی بن بۆ ئه‌وه‌ی مسـۆگه‌ر بكرێت هیچ ڕووبه‌ڕووبوونه‌وه‌ی ڕاسـته‌وخۆیان له‌گه‌ڵ به‌شـداران له‌ كۆنگره‌كه‌ نه‌بێت. خۆپـیشـانده‌ران گله‌یی‌یان كردووه‌ كه‌ ئه‌وان ده‌مكوت كراون، وه‌ هه‌رچه‌نده‌ شـكایه‌تیان بردبووه‌ به‌رده‌م دادگا به‌ڵام سه‌ركه‌وتوو نه‌بوون.

بۆ دیموكراته‌كان و كۆماریـیه‌كان ئه‌وه‌ی كه‌ كۆنگره‌كه‌یان له‌ چ شـوێـنێـك به‌ڕێوه‌بچێت به‌شـێـكی بڕیاری سـتراتیژیـیه‌. هه‌ر پارتیـیه‌ك هیواداره‌ ئه‌و سه‌رنج و دڵـگه‌رمیـیه‌ی له‌ ده‌وروبه‌ری كۆنگره‌كه‌یان ده‌بێت ده‌رفه‌تیان زیاتر بكات كه‌ ده‌نگی ویلایه‌تی میواندار له‌ هه‌ڵـبژاردنی مانگی یازده‌ بـبه‌نه‌وه‌.

به‌ڵام به‌ڵـگه‌یه‌كی كه‌م هه‌یه‌ نیشـان بدات بگه‌نه‌ به‌ ئاواتیان، به‌پـێی شـاره‌زای زانسـتی سـیاسی كاثرین پـێرسـن له‌ زانكۆی مینه‌سـۆتا. پـێرسـن ده‌ڵێت دور نیـیه‌ پاڵێوراوی كۆماری جۆن مه‌ككه‌ین بتوانێت مینه‌سـۆتا بـباته‌وه‌، وه‌ ئه‌گه‌ر بیباته‌وه‌ ته‌نها له‌به‌ر ئه‌وه‌ نیـیه‌ كه‌ كۆنگره‌ی كۆماری له‌ ســانت پـۆڵه‌.

" هه‌رچه‌نده‌ چه‌نده‌ها سـاڵه‌ مینه‌سـۆتا ده‌نگی بۆ دیموكراتان داوه‌ له‌ پـێشـبڕكێی سه‌رۆكایه‌تی، له‌ سـاڵی 2004 پاڵێوراوی دیموكراتان جۆن كێری ته‌نها به‌ 3 خاڵ به‌سه‌ر سه‌رۆك بوشـدا سه‌ركه‌وت، واته‌ جیاوازیـیه‌كان كه‌مبوونه‌ته‌وه‌، وه‌ ئێمه‌ فه‌رماندارمان كۆماریـیه‌ و سیناتۆریشـمان كۆماریـیه‌ بۆیه‌ ئه‌و بـۆچوونه‌ هه‌یه‌ كه‌ به‌ ڕاسـتیشی ده‌زانم مینه‌سـۆتا ویلایه‌تێـكی جۆلانه‌یی‌یه‌."

پـێرسن ده‌ڵێت وه‌ك باقی خه‌ڵكی وڵات نیگه‌رانی ئابوریش مه‌سه‌له‌ی سه‌ره‌كیـیه‌ له‌ لای خه‌ڵـكی مینه‌سـۆتا، وه‌ ئه‌و پاڵـێوراوه‌ی به‌ چاكترین شـێوه‌ باسی ئه‌م نیگه‌رانیـیه‌ بكات پـێده‌چێت له‌ مانگی یازده‌ ئه‌م ویلایه‌ بـباته‌وه‌.

وه‌ ئێسـتا سه‌رنجی وڵات دابه‌ش بووه‌ له‌ نێوان سـانت پـۆڵ و زریانی گۆسـتاڤ كه‌ به‌ره‌و ئه‌مریكا كه‌وتۆته‌ ڕێ.

XS
SM
MD
LG