Accessibility links

كۆشـكی سـپـی بۆ كۆتایی هێنان به‌ قه‌یرانی ئۆسیتیای باشور فشـاره‌كانی خۆی بۆ سه‌ر ڕوسـیا زیاد ده‌كات

  • Paula Wolfson

به‌ مه‌به‌سـتی كۆتایی‌هێنان به‌ شه‌ڕێ په‌ره‌سـه‌ندوو له‌ هه‌رێمی ئۆسـیتیای باشوری دابڕاو له‌ گورجسـتان، كۆشـكی سـپی ئه‌مریكا فشـاری خۆی له‌سه‌ر ڕوسـیا بۆ ئه‌و مه‌به‌سـته‌ فره‌ ده‌كات.
له‌و باره‌یه‌وه‌ پاوڵا ۆڵفسـن په‌یامنێری ده‌نگی ئه‌مریكا له‌ په‌كینی پایته‌ختی چینه‌وه‌ كه‌ له‌وێ سه‌رۆك بوش ئاماده‌ی یاریـیه‌كانی ئۆڵـمپـی ده‌بێت ڕاپـۆرتێـكی ناردووه‌ و هاوكارمان موعته‌به‌ر شـیروانی به‌ كوردی ئاماده‌ی كردووه‌.

سه‌رۆك بوش ده‌ڵێت ڕوسـیا له‌ تامی بردۆته‌ ده‌رێ و زۆر ڕۆیشـتووه‌ و ده‌بێت ڕازیبێت ده‌موده‌ست جیاوازیـیه‌كانی له‌گه‌ڵ گورجسـتانی دراوسـێ چاره‌سه‌ر بكات.

له‌ وتووێـژی له‌گه‌ڵ كه‌ناڵی ته‌له‌فیزیۆنی ئه‌مریكایی NBCسه‌رۆك گوتی ئه‌و توندبوو له‌ كاتی گفتوگۆی ڕووبه‌ڕووی له‌گه‌ڵ سه‌رۆك وه‌زیری ڕوسـیا ڤلادیمیر پـوتن له‌ ڕۆژی هه‌ینی و له‌ كاتی ڕێوڕه‌سـمه‌كانی ئۆڵـمپـیك.

سه‌رۆك بوش: " من پـێم گوت ئه‌م توندوتیژیـیه‌ جێـگای قبوڵـكردن نیـیه‌. من نه‌ك ته‌نها ئه‌وه‌م به‌ ڤلادیمیر پـوتن گوت به‌ڵـكو به‌ سـه‌رۆكی وڵات دمیتری مێدڤێدێڤیشم گوت."

سه‌رۆك ئه‌و قسـانه‌ی له‌گه‌ڵ به‌ڕێز پـوتن كردبوو ته‌نیا چه‌ند كاتژمێران پاش ئه‌وه‌ی گورجسـتان هێزه‌كانی ناردبوو بۆ ئۆسیتیا باشوری و ڕوسـیاش به‌ هێز وه‌ڵامی دابۆوه‌.

له‌و كاته‌وه‌ تا ئێسـتا گورجسـتان یه‌كه‌كانی له‌شـكری كشـاندوونه‌ته‌وه‌ و داوای گفتوگۆی كردووه‌. به‌ڵام مۆسـكۆ وه‌ڵامی نه‌داوه‌ته‌وه‌ و ناوچه‌كانی ده‌ره‌وه‌ی سـتانی جیابۆوه‌ی گورجسـتانی بۆمبباران كردووه‌.

به‌ڕێز بوش به‌ NBCگوت ده‌بێت شـتێـك بكرێت ئه‌م خوێن ڕێژیـیه‌ به‌ كۆتایی بێت. ئه‌و ڕوونی كرده‌وه‌ كه‌ به‌ سه‌رۆك وه‌زیر پـوتن و سه‌رۆكی وڵاتی گوتووه‌ هه‌نگاوی بێت له‌سه‌ر مۆسـكۆ ڕاده‌وه‌سـتێت.

سه‌رۆك بوش: " من نیگه‌رانی قوڵی خۆمم ده‌ربڕی سه‌باره‌ت به‌ وه‌ڵامی ناته‌واوی ڕوسـیا و ئێمه‌ به‌ توندی بۆمبارانكردنی ده‌ره‌وه‌ی ئۆسیتیای باشوری ناپه‌سه‌ند ده‌كه‌ین."

له‌ هه‌مان ده‌م كۆشـكی سـپی زمانێـكی توندتری به‌كارهێناوه‌ بۆ نیشـاندانی گفتوگۆیه‌كی نێوان جێـگری سه‌رۆك دیك چه‌ینی و سه‌رۆكی گورجسـتان میخائیل ساكه‌شـڤیلی.

ده‌مڕاسـتێـكی كۆشـكی سـپی گوتی چه‌ینی ته‌ئكیدی له‌سه‌ر هاوپه‌یمانێتی ئه‌مریكا له‌گه‌ڵ گورجسـتان كردبوو كه‌ له‌وانیه‌ نزیـكترین هاوپه‌یمانی بێت له‌ ناو كۆماره‌كانی یه‌كێتی سـۆڤێتی جاران.

ئه‌و گوتی جێـگری سه‌رۆك به‌ سه‌رۆكی گورجسـتانیشی گوتبوو ناكرێت ده‌ستدرێژی ڕوسـیا بێ وه‌ڵام بمێنێته‌وه‌. ده‌مڕاسـته‌كه‌ ده‌شـڵێت چه‌ینی هۆشـداریـیه‌كانی پـێشـووی كاربه‌ده‌سـتانی به‌ڕێوه‌به‌رایه‌تی دووپات كردۆته‌وه‌ كه‌ ده‌ڵێن ڕوسـیا په‌یوه‌ندی خۆی له‌گه‌ڵ ئه‌مریكا له‌ مه‌ترسی زیانێـكی جیدیدا بێت.

XS
SM
MD
LG