Accessibility links

له‌شـكری ئه‌مریكایی له‌ عێراق هه‌واڵی كوژرانی 15 چه‌كدار ڕاده‌گه‌یه‌نێت


له‌شـكری ئه‌مریكایی له‌ عێراق ده‌ڵێت هێزه‌كانیان شه‌وی سێشه‌ممه‌ 15 میلیشـیایان له‌ گه‌ڕه‌كی ئه‌لسه‌دری زۆرینه‌ شیعه‌نشین له‌ به‌غدا كوشـتووه‌ واته‌ له‌و ناوچه‌یه‌ی له‌ لایه‌ن چه‌كدارانی سـوپای ئه‌لمه‌هدی سه‌ر به‌ موقته‌دا ئه‌لسه‌دری مه‌لای توندڕه‌وی شیعه‌ كۆنتڕۆڵ كراوه‌.

به‌یانـنامه‌یه‌كی له‌شـكری ئه‌مریكایی له‌و باره‌یه‌وه‌ ده‌ڵێت له‌و شه‌ڕ و پـێـكدادانه‌ی كه‌ له‌ دره‌نگانێـكی ڕۆژی سێشه‌ممه‌دا له‌ گه‌ڕه‌كی ئه‌لسه‌در ده‌سـتیـپـێـكرد هێزی پیاده‌ و ئاسـمانی به‌شـداریـیان تیادا كردووه‌. له‌ یه‌كێـك له‌ ڕووداوه‌كانی هێرشـه‌كه‌دا له‌شـكری ئه‌مریكایی ده‌ڵێت هێزه‌كانیان موشـه‌كیان ناوه‌ به‌ ئۆتۆمبیلێـكه‌وه‌ كه‌ سه‌رگه‌رمی گواسـتنه‌وه‌ی موشه‌ك و ته‌قه‌مه‌نی بووه‌ له‌ گه‌ڕه‌كی ئه‌لسه‌در له‌ به‌غدا.

هاوكات له‌شـكری ئه‌مریكایی نكوڵی له‌ هه‌بوونی هاوڵاتیـیانی سڤیل له‌ ده‌می ڕووداوه‌كه‌دا كرد.

به‌ڵام ئاژانسی هه‌واڵه‌كانی ئه‌سۆشێتد پـرێس ده‌ڵێت به‌ لایه‌نی كه‌م هه‌شت هاوڵاتی سڤیل له‌ هێرشه‌كه‌دا كوژراون.

له‌ باكوری عێراقیش به‌هۆی ته‌قینه‌وه‌ی بۆمبێـكی لكێنراو به‌ ماشـێـنێـكه‌وه‌ له‌ نزیـك ته‌لاری پارێزگای شـاری موسـڵ سه‌ربازێـكی عێراقی كوژراوه‌ و چواریش بریندار بوون.

سه‌باره‌ت توندوتیژی و ته‌قینه‌وه‌كانی شـاری موسـڵ په‌یامنێری ده‌نگی ئه‌مریكا ئه‌میر گۆران له‌و شـاره‌وه‌ ڕاپـۆرتێـكی ناردووه‌ و ده‌توانن گوێبیسـتی بن له‌ ڕێـگه‌ی كلیـكـكردنی ئه‌و فایله‌ ده‌نـگیـیه‌ی سه‌ره‌وه‌، ماوه‌كه‌ی 2 خوله‌كه‌.

XS
SM
MD
LG