Accessibility links

ڕایس داوا له‌ ڕێبه‌رانی فه‌له‌ستین و ئیسرائیل ده‌كات وتووێـژه‌كانی ئاشـتی ده‌سـتپـێبكه‌نه‌وه‌


وه‌زیری ده‌ره‌وه‌ی وڵاته‌ یه‌كگرتووه‌كانی ئه‌مریكا داوای له‌ ڕێبه‌رانی فه‌له‌ستین و ئیسرائیل كردووه‌ كه‌ ده‌سـتبه‌جێ وتووێـژه‌كانی ئاشـتی بخه‌نه‌وه‌ گه‌ڕ و ڕایگه‌یاند كه‌ بارودۆخی ڕۆژهه‌ڵاتی ناوه‌ڕاست دانوسـتاندنی گه‌ره‌كه‌ نه‌ك ده‌سـتنیشـانكردنی تاوان.

هاوكات خانم كۆنده‌لیزا ڕایس گوتی ڕێـكخراوی حه‌ماس ده‌بێت موشه‌كبارانی خه‌ڵـكی سـڤیلی ئیسـرائیل ڕابگرێت و گوتیشی ئه‌مریكا نیگه‌رانه‌ سه‌باره‌ت به‌ ژیانی خه‌ڵـكی سـڤیلی فه‌له‌سـتینی كه‌ له‌ شه‌ڕ و پـێـكداداندا گیریان خواردووه‌.

خانم ڕایس ئه‌مانه‌ی له‌ قاهیره‌ی پایته‌ختی میسـر ڕاگه‌یاند پاش كۆبوونه‌وه‌ی له‌گه‌ڵ سه‌رۆكی میسـری حوسـنی موباره‌ك و وه‌زیری ده‌ره‌وه‌ی ئه‌و وڵاته‌ ئه‌حمه‌د ئه‌بو غه‌یث.

بڕیاره‌ هه‌ردوو ڕۆژی سێشه‌ممه‌ و چوارشه‌ممه‌ كۆبوونه‌وه‌ له‌گه‌ڵ ئێهود ئۆڵمه‌رتی سه‌رۆك وه‌زیرانی ئیسرائیل و مه‌حمود عه‌باسی سه‌رۆكی فه‌له‌سـتینی سـازبدات.

ئه‌م سه‌ردانه‌ی خانم ڕایس یه‌ك ڕۆژ پاش كشـانه‌وه‌ی هێزه‌كانی ئیسرائیل له‌ باكوری غه‌ززه‌ دێته‌ كایه‌وه‌ و دوای پـێـنج ڕۆژ له‌ هه‌ڵـمه‌تی له‌شـكری كه‌ زیاتر له‌ 100 میلیتان و خه‌ڵـكی سڤیلی فه‌له‌سـتینی كوشت له‌گه‌ڵ 2 سه‌ربازی ئیسـرائیلیدا.

هه‌رچه‌نده‌ كۆمه‌ڵی حه‌ماس ئه‌و كشـانه‌وه‌یه‌ی به‌ سه‌ركه‌وتنی خۆیان داناوه‌، به‌ڵام به‌ڕێز ئۆڵمه‌رت به‌ڵێنی داوه‌ كرداری له‌شـكری زیاتر بكات له‌ غه‌ززه‌ كه‌ حه‌ماس له‌وێوه‌ ئیسرائیل موشـك باران ده‌كات.

XS
SM
MD
LG