Accessibility links

هێـله‌ری كلنتن و جۆن مه‌كـكه‌ین له‌ هه‌ڵـبژاردنه‌ به‌رایـیه‌كانی نیو هامشه‌ردا ده‌یبه‌نه‌وه‌


ئه‌نجامی هه‌ڵـبژاردنه‌ به‌رایـیه‌كانی سـتانی نیو هامشه‌ر بۆ پـۆستی سه‌رۆكایه‌تی ئه‌مریكا نیشـانی ده‌ده‌ن سـیناتۆری سـتانی نیویۆرك هـێـله‌ری كلنتن به‌سه‌ر كاندیده‌كانی تری پارتی دیموكراتدا سه‌ركه‌وتووه‌ و هه‌روه‌ها سـیناتۆری سـتانی ئه‌ریزۆنا جۆن مه‌كـكه‌ین ئه‌ویش پله‌ی یه‌كه‌می له‌ نیو كاندیده‌كانی پارتی كۆماریدا به‌ده‌سـتهێناوه‌.
په‌یامنێری ده‌نگی ئه‌مریكا له‌ نیو هامشه‌ر جێم مه‌ڵۆن ڕاپـۆرتێـكی له‌و باره‌یه‌وه‌ ناردووه‌ و هاوكارمان به‌ڵێن سـاڵح وه‌ریگێڕاوه‌ته‌ سه‌ر زمانی كوردی.

سیناتۆر جۆن مه‌كـكه‌ین گه‌ڕانه‌وه‌یه‌كی به‌رچاوی سـیاسی به‌خۆوه‌ بینی به‌و سه‌ركه‌وتنه‌ی به‌سه‌ر فه‌رمانڕه‌وای پـێشـووی سـتانی ماسه‌چوسسدا هێنای.

سـیناتۆر جۆن مه‌كـكه‌ین ده‌ڵێت " ئه‌و ته‌مه‌نه‌م جێـهێشـتووه‌ و گه‌ڕامه‌وه‌ و هه‌ڵـبژاردنه‌كه‌ی نیو هامشه‌ر ئه‌وه‌ی نیشـاندا گه‌ڕانه‌وه‌ یانی چی."

بێـجگه‌ له‌ ده‌نگده‌رانی كۆماری جۆن مه‌كـكه‌ین سـوودی له‌ پـشـتیوانی ده‌نگده‌رانی بێ لایه‌نیش بینیوه‌ كه‌ ده‌توانن له‌ هه‌ڵـبژاردنه‌ به‌رایـیه‌كانی هه‌ردوو لایه‌نی كۆماری و دیموكراته‌كانیشـدا ده‌نگ بده‌ن.

سه‌ركه‌وتنه‌كه‌ی مه‌كـكین گه‌ڕانه‌وه‌ی مێت ڕۆمنیـیه‌ كه‌ هیواداربوو سه‌رله‌نوێ هه‌ڵـسێـته‌وه‌ پاش ئه‌وه‌ی له‌ ئایاوا له‌ پله‌ی دووهه‌مدا بوو. مایك هه‌كه‌بی له‌ نیو هامشه‌ر به‌ پله‌ی سـێهه‌م هات و ڕوودی جیلیانیش به‌ پله‌ی چوارهه‌م بوو.

بۆ دیموكراته‌كانیش سـیناتۆر هێـله‌ری كلنتن به‌ ئه‌نجامێـكی نزیـك توانی سه‌ركه‌وتن به‌سـه‌ر سیناتۆر باراك ئۆبامادا بهێنێت. هێـله‌ری سـوپاسی لایه‌نگرانی كرد و په‌یمانیشی دا به‌رده‌وامبێت له‌ هه‌وڵه‌كانی تا بـبێته‌ كاندیدی سه‌رتاسه‌ری دیموكراته‌كان بۆ هه‌ڵـبژاردنی پـۆسـتی سه‌رۆكایه‌تی ئه‌مریكا و له‌ لـێدوانێـكیشـدا سـوپاسی ده‌نگده‌رانی نیو هامشه‌ری كرد.

له‌ هه‌فته‌كانی داهاتوودا هه‌ڵـبژاردنه‌ به‌رایـیه‌كان ڕووه‌و سـتانه‌كانی ڕۆژئاوا و باشوری ئه‌مریكا ده‌چن وه‌ك ستانه‌كانی نیڤادا و سـاوث كارۆلاینا و فلۆریدا و وه‌هاش چاوه‌ڕوان ده‌كرێت هه‌ڵمه‌ته‌كانی هه‌ڵـبژاردن له‌ نێوان كاندیده‌كاندا گه‌رمتربێت.

XS
SM
MD
LG