Accessibility links

به‌هۆی ته‌قینه‌وه‌ی بۆمبێـك به‌ كاروانێـكی له‌شـكری پاكسـتاندا به‌ لایه‌نی كه‌م 30 كه‌س ده‌كوژرێن


پـۆلیسی پاكسـتان ده‌ڵێت ڕۆژی پـێـنجشه‌ممه‌ بۆمبێـك به‌ ماشێنێـكی له‌شـكریدا له‌ باكوری ڕۆژئاوای وڵاته‌كه‌یاندا ته‌قیوه‌ته‌وه‌، وه‌ به‌ لایه‌نی كه‌م 30 كه‌سی كوشـتووه‌، وه‌‌ زۆربه‌یان سه‌رباز بوون.

ته‌قینه‌وه‌كه‌ بووه‌ته‌ مایه‌ی گڕگرتنی ماشێنێـكی پـڕ له‌ ته‌قه‌مه‌نی كه‌ به‌ ڕێـگایه‌كی ناوچه‌ی دووره‌ ده‌ستی دۆڵی سوات‌دا ده‌ڕۆیشت. به‌ لایه‌نی كه‌م 12 كه‌سی دیكه‌ش له‌ ڕووداوه‌كه‌دا برینداربوون.

لـێـپـرسـراوی خۆجێی سوات (فازلوور ڕه‌حمان) ده‌ڵێت نزیكه‌ی 45 كه‌سی نیمچه‌ سه‌رباز له‌ ناو ماشـێـنه‌كه‌دا بوون و ڕه‌نگه‌ هه‌ر هه‌موویان له‌ ته‌قینه‌وه‌كه‌دا كوژرابن.

فازلوور ڕه‌حمان ده‌ڵێت گرژیـیه‌كان له‌ ناوچه‌ی سوات پـتر بووه‌ له‌وه‌تای له‌شـكری پاكسـتان زیاتر له‌ 2 هه‌زار سه‌ربازی خۆی له‌م هه‌فته‌یه‌دا له‌ ناوچه‌كه‌دا به‌ مه‌به‌ستی ڕاوه‌دوونانی چه‌كدارانی سه‌ر به‌ تاڵیبان بڵاوكردۆته‌وه‌.

شـایانی باسه‌ دۆڵی سوات كه‌وتۆته‌ ناوچه‌كانی باكوری ڕۆژئاوا و به‌ قه‌ڵای گروپـێـكی توندڕه‌و داده‌نرێت كه‌ به‌ ته‌هریك نیفازی شه‌ریعه‌ موحه‌مه‌د ناسراوه‌، وه‌ په‌یوه‌ندی پـته‌وی له‌گه‌ڵ چه‌كدارانی تاڵیبانی ئه‌فغانسـتاندا هه‌یه‌.

XS
SM
MD
LG