Accessibility links

نێردراوی نه‌ته‌وه‌ یه‌كگرتووه‌كان بۆ بۆرما له‌گه‌ڵ ڕێبه‌ری له‌شـكری ئه‌و وڵاته‌ و خانم ئۆونگ سان سوو چی كۆده‌بێته‌وه‌


نێردراوی نه‌ته‌وه‌ یه‌كگرتووه‌كان بۆ بۆرما ڕۆژی سێشه‌ممه‌ له‌ هه‌وڵـێـكیدا بۆ كۆتایی هێنان به‌ سه‌ركوتكردنی‌ خۆپـیشـانده‌رانی لایه‌نگری دیموكراسی له‌ لایه‌ن حكومه‌ته‌ له‌شـكریـیه‌كه‌ی بۆرماوه‌، له‌گه‌ڵ گه‌وره‌ ڕێبه‌ری ئه‌و وڵاته‌دا كۆبۆته‌وه‌.

ڕۆژی سێشه‌ممه‌ نێردراوی تایبه‌ت ئیبراهیم گه‌مباری له‌گه‌ڵ ‌ ژه‌نه‌ڕاڵ ثان شوێ له‌ نایپـیتاو كۆبووه‌وه‌، ئه‌و شوێنه‌ی كه‌ ڕێبه‌رانی حكومه‌ته‌ له‌شـكریـیه‌كه‌ی بۆرما كردوویانه‌ به‌ پایته‌ختی خۆیان، كه‌‌ له‌ شـاری ڕانگوونه‌وه‌ دووره‌، وه‌‌ له‌وێ هه‌فته‌ی ڕابردوو خۆپـیشـاندانه‌ ناڕه‌زایی‌یه‌ مه‌زنه‌كان سه‌ركوت كران.

به‌ڕێز گه‌مباری پاش كۆبوونه‌وه‌ی له‌گه‌ڵ ژه‌نه‌ڕاڵ شوێ گه‌ڕایه‌وه‌ بۆ ڕانگوون و له‌وێ له‌گه‌ڵ ڕێبه‌ری ئۆپـۆزیسـیۆنی ده‌ستبه‌سه‌ر خانم ئۆونگ سان سوو چی جارێـكی دیكه‌ كۆبووه‌ته‌وه‌. پاشـان گه‌مباری بۆرمای به‌جێهێشت.

پـێشـبینی ده‌كرا گه‌مباری فشـار بخاته‌ سه‌ر ژه‌نه‌ڕاڵ ثان شوێ و حكومه‌ته‌كه‌ی تاكو ده‌ست له‌ سه‌ركوتكردنی خۆپـیشـانده‌ره‌كان هه‌ڵبگرن و ده‌سـتگیراوه‌كان ئازاد بكه‌ن و به‌ره‌و چاكسـازی دیموكراسی ڕاسته‌قینه‌ بڕۆن.

هه‌تا ئێسـتاش ڕوون نه‌بووه‌ته‌وه‌ ئه‌نجامی كۆبوونه‌وه‌كان به‌چی گه‌یشتووه‌.

هاوكاتی ئه‌وه‌ی به‌ڕێز گه‌مباری كۆتایی به‌ سه‌ردانه‌كه‌ی بۆ بۆرما هێنا، ده‌سته‌ی باڵای مافه‌كانی مرۆڤی سه‌ر به‌ نه‌ته‌وه‌ یه‌كگرتووه‌كان دانیشـتنێـكی تایبه‌تیـیان له‌ ژنێڤ سه‌باره‌ت به‌ بۆرما سـازكرد.

یه‌كێتی ئه‌وروپاش داوای له‌ ده‌سته‌ی باڵای مافه‌كانی مرۆڤی نه‌ته‌وه‌ یه‌كگرتووه‌كان كردووه‌ به‌ توندی ئه‌و سه‌ركوتكردنه‌ دڕندانه‌یه‌ی ده‌سه‌ڵاتدارانی بۆرما بۆ خۆپـیشـاندانه‌ ئاشتیـیه‌كان سه‌رزه‌نشت بكه‌ن.

XS
SM
MD
LG