Accessibility links

هه‌ڵمه‌ته‌كانی له‌شـكری لوبنانی بۆ سه‌ر چه‌كداره‌كانی فه‌تحولئیسلام به‌رده‌وامه‌


كاربه‌ده‌ستانی لوبنانی ده‌ڵێن له‌ دواینترین شه‌ڕ و پـێـكدادانی نێوان حكومه‌ت و ملیتانه‌ ئیسلامیـیه‌كانی ناو كه‌مپی په‌نابه‌رانی فه‌ڵه‌ستینی نزیك ته‌ڕابلوس 3 سه‌رباز كوژراون.

له‌شكری لوبنانی پاش نزیكه‌ی سێ هه‌فته‌ له‌ شه‌ڕ كردن ده‌ڵێن ئه‌وان هه‌نگاو به‌هه‌نگاو ئه‌و شوێنانه‌ كۆنتڕۆڵ ده‌كه‌ن كه‌ له‌لایه‌ن فه‌تحولئیسلامه‌وه‌ گیراوه‌.

ڕۆژی شه‌ممه‌ دوكه‌ڵێـكی ڕه‌شی زۆر له‌ كه‌مپی نه‌هرولباردی باكوری لوبنانه‌وه‌ به‌رز بووه‌وه‌. دانیشتوانی كه‌مپه‌كه‌ به‌ ده‌نگی ئه‌مریكایان ڕاگه‌یاند كه‌ كه‌مپه‌كه‌ وێرانه‌، كاره‌بای نیه‌ و ئاوی كه‌مه‌.

له‌و ده‌مه‌وه‌ی ئه‌و شه‌ڕه‌ له 20 ی مانگی پـێـنجه‌وه‌ ده‌ستی پـێـكردووه‌ به‌ده‌یان هه‌زار په‌نابه‌ر له‌وێ ڕایان كردووه‌، به‌ڵام هێشتاش به‌هه‌زاران كه‌سی تر له‌وێن.

هه‌تا ئێسـتا به‌لایه‌نی كه‌م 115 كه‌س له‌ ملیتانه‌كان و كه‌سانی مه‌ده‌نی و نزیكه‌ی 50 سه‌ربازی لوبنانی كوژراون.

ملیتانه‌كان به‌به‌رده‌وامی داواكاری حكومه‌ت بۆ خۆ به‌ده‌سته‌وه‌دانیان ڕه‌تده‌كه‌نه‌وه‌، وه‌ به‌ڵێنیان داوه‌ تا مردن شه‌ڕ بكه‌ن.

ده‌سه‌ڵاتدارانی لوبنانی ده‌شڵێن 32 چه‌كداری فه‌تحولئیسلامیان ده‌سـتگیركردووه‌.

له‌ لایه‌كی دیكه‌وه‌ كاربه‌ده‌سـان ده‌ڵێن ڕۆژی هه‌ینی به‌لایه‌نی كه‌م 9 عێراقیـیان به‌ پاسـپۆرتی سـاخته‌ هه‌وڵیان داوه‌ له‌ ڕێـگه‌ی سوریاوه‌ بـچنه‌ ناو لوبنانه‌وه‌. ڕوونیش نیـیه‌ بۆ چ مه‌به‌سـتێـك وسـتویانه‌ بچنه‌ ناو لوبنانه‌وه‌.

XS
SM
MD
LG