Accessibility links

فڕۆکه‌یه‌کی بچوکی ئه‌مریکی به‌ر باڵه‌خانه‌یه‌کی نیویۆرک ده‌که‌وێت


فڕۆکه‌یه‌کی بچوک خۆی کێشاوه‌ به‌ باڵه‌خانه‌یه‌کی نیشته‌جێی شاری نیویۆرک، به‌ڵام به‌ پێی ده‌زگای بیرۆی لێکۆڵینه‌وه‌ی فیدرالی واتا FBI هیچ نیشانه‌یه‌کی کاری تیرۆریزمی پێوه‌ دیار نی‌یه‌.

وێنه‌یه‌كی ته‌له‌فزیۆنی شوێنه‌واری ڕووداوه‌که‌ نیشانی ده‌دات که‌وا ئاگر و دوکه‌ڵێکی زۆر له په‌نجه‌ره‌کانی نهۆمه‌ ناوه‌ندییه‌کانی باڵه‌خانه‌که‌وه‌‌ هاتونه‌ته‌ ده‌رێ که‌ ده‌که‌وێته‌ به‌شی ڕۆژهه‌ڵاتی ناوچه‌ی مه‌نهاتنه‌وه‌ له شاری نیویۆرک‌.

له ئه‌نجامی ڕووداوه‌که‌، پارچه‌ تێکشکاوه‌کانی فڕۆکه‌که‌ و ئه‌و به‌شانه‌ی باڵه‌خانه‌که‌ که فڕۆکه‌که‌ خۆی پیادا‌وه‌، که‌وتۆته سه‌ر شه‌قامه‌كه‌ی به‌رده‌می باڵه‌خانه‌که‌.

کاربه‌ده‌ستانی پۆلیس و فریاکه‌وتنیش ده‌ستبه‌جێ گه‌یشتونه‌ته‌‌ شوێنی ڕووداو‌ه‌که. هه‌تاوه‌کو ئێستاش هه‌واڵه‌کان باس له گیان له ده‌ستدانی دوو که‌س له ئه‌نجامی ڕووداوه‌که‌ ده‌که‌ن.

ڕاپۆرته‌ هه‌واڵیه‌کانی ئێواره‌ی چوارشه‌ممه‌ ده‌ڵێن فڕۆکه‌که‌ به‌ ناوی کۆری لایدڵ تۆمار کراوه‌ که یاریزانێکی تیپی (یانکیس) ی به‌ناوبانگی به‌یس بۆڵی نیویۆرکه. تیپی یانکیس له‌ لای‌ خۆیانه‌وه‌ پشت ڕاستیان کرده‌و‌ه‌ که‌ یه‌کێک له قوربانی‌یه‌کان لایدڵه که له ساڵێک که‌متره مۆڵه‌تی لێخۆڕینی فڕۆکه‌ی هه‌یه‌‌. لێپرسراوانی ‌‌شاره‌که‌ ده‌ڵێن پاسپۆرتی ئه‌و یاریزانه‌یان له‌سه‌ر شه‌قامه‌که‌ دۆزیوه‌ته‌وه‌ و لێکۆڵینه‌وه‌ له‌سه‌ر هۆکاری ڕووداوه‌که‌ ده‌که‌ن.

هه‌رچه‌ندێکه‌ که نیشانه‌کان وا ده‌رده‌خات ڕووداوێکی ئاسایی بووه‌، به‌ڵام ئاژانسی به‌رگری ئاسمانی ئه‌مریکای باکور ده‌ستبه‌جێ فڕۆکه‌ی شه‌ڕکه‌ری به‌ ئاسمانی چه‌ند شارێکی ئه‌مریکادا هه‌ستانووه‌، به‌ڵام ناوی ئه‌و شارانه‌ ئاشکرا نه‌کراوه‌.

ڕووداوه‌که‌ دانیشتوانی شاری نیویۆرکی ترساند، ئه‌و شاره‌ی که له یانزده‌ی سه‌پته‌مبه‌ردا، تیرۆرستان به‌ دوو فڕۆکه‌‌ی ڕفێنراوه‌وه خۆیان کێشا به‌ هه‌ردوو تاوه‌ره‌که‌ی ناوه‌ندی بازرگانی جیهانی و له ئه‌نجامدا هه‌ردوو باڵه‌خانه‌که‌ وێران بوون. ‌‌

XS
SM
MD
LG