Accessibility links

ئێران و یه‌كێتی ئه‌وروپا ده‌ڵـێـن وتووێـژه‌كانیان بنیاتنه‌ر بووه


ڕۆژی شه‌ممه‌، دوای وتووێـژێـكی بنیاتنه‌ر و ئه‌رێنی نێوان ئێران و یه‌كێتی ئه‌وروپا سه‌باره‌ت به‌ به‌رنامه‌ ناوه‌كیـیه‌كه‌ی تاران هه‌دوولایان ده‌ڵـێـن ئه‌وان جارێـكی تر ڕۆژی یه‌كشه‌ممه‌ كۆده‌بنه‌وه‌.

وتووێـژه‌كانی نێوان دانوسـتانده‌ری باڵای ناوه‌كی ئێرانی عه‌لی لاریجانی و به‌ڕێوه‌به‌ری سـیاسه‌تی ده‌ره‌وه‌ی یه‌كێـتی ئه‌وروپا خافێر سـۆلانا ڕه‌نگه‌ دوا هه‌ل بێت له‌به‌رده‌م تاراندا تا له‌سه‌ر به‌رنامه‌ ناوه‌كیـیه‌كه‌ی خۆی له‌ سـزای نێونه‌ته‌وه‌یی ڕزگار بكات.

هه‌ر ڕۆژی شه‌ممه‌ و له‌ هێـلسـینكی سه‌رۆك وه‌زیری چینی داوای له‌ ئێران كرد ڕه‌چاوی مه‌ترسـیـیه‌كانی كۆمه‌ڵی نێونه‌ته‌وه‌یی له‌سه‌ر به‌رنامه‌ ناوه‌كیـیه‌كه‌ی بكات. هه‌روه‌ها وێـن جیاباۆ له‌ دژی زیادكردنی فشـاریش له‌سه‌ر تاران هۆشـداری دا، وه‌ ده‌ڵـێـت ده‌بێت كێشه‌ ناوه‌كیـیه‌كه‌ی ئێران به‌ ڕێـگای ئاشـتیـیانه‌ چاره‌سه‌ر بكرێت.

شـایانی باسه‌ چین و ڕوسـیا بۆ ماوه‌یه‌كی درێژ له‌گه‌ڵ مه‌سه‌له‌ی سـزادانی ئێراندا نه‌بوون.

وڵاته‌ یه‌كگرتووه‌كانی ئه‌مریكاش فشـار بۆ سزادانی ئێران ده‌كات له‌سه‌ر پابه‌ند نه‌بوونی به‌ دوا مۆڵه‌تی نه‌ته‌وه‌ یه‌كگرتووه‌كان، كه‌ داوای لێـكرابوو تا 31 ی مانگی هه‌شت كاره‌كانی پـیتاندنی یۆرانیۆم ڕابگرێت.

هه‌روه‌ها وڵاته‌ یه‌كگرتووه‌كان ده‌ڵـێت پـێشـبینی ده‌كرێت هه‌فته‌ی داهاتوو ئه‌نجومه‌نی ئاسایشی نه‌ته‌وه‌ یه‌كگرتووه‌كان ده‌ستبه‌كاربێت بۆ ئاماده‌كردنی بڕیارێـك كه‌ تیایدا سـزا به‌سه‌ر ئێراندا بـسه‌پـێنرێت.

XS
SM
MD
LG