Accessibility links

لوبنان و ئیسرائیل دوا به‌ دوای هێرشه‌ له‌شکرییه‌کان یه‌کتری گوناهبار ده‌که‌ن


لوبنان ئیسرائیلی گوناهبار کردووه‌ به‌وه‌ی له هێرشه ‌له‌شکرییه‌کاندا کرداری دڕندانه‌ ئه‌نجام ده‌ده‌ن و بانگه‌شه‌ی ئاگربه‌ستیان کردووه‌. ئیسرائیلیش ئه‌و ڕه‌خنانه‌ی ڕه‌ت کردۆته‌وه‌ و لوبنانی گوناهبار کردووه‌ به‌وه‌ی پشتیوانی له‌ تیرۆرستان ده‌که‌ن.

لوبنان ڕۆژی هه‌ینی داوای ڕێکخستنی کۆبونه‌وه‌یه‌کی هه‌نوکه‌یی ئه‌نجومه‌نی ئاسایشی کرد له کاتێکدا که فڕۆکه‌ جه‌نگیه‌کانی ئیسرائیل له سێهه‌م ڕۆژی بۆردومانه‌کانیان بۆ سه‌ر بنکه‌ گومانلێکراوه‌ تیرۆرستیه‌کان له لوبنان به‌رده‌وام بوون.

شاندی تایبه‌تی لوبنان له ئه‌نجومه‌نی ئاسایش، نوهاد موحه‌ممه‌د هێزه‌کانی ئیسرائیلی تاوانبار کرد به‌وه‌ی زه‌بروزه‌نگ به‌کارده‌هێنن و به‌ مه‌به‌سته‌وه‌ هێرش ده‌که‌نه‌ سه‌ر خه‌ڵکانی سیڤیڵ.

کاربه‌ده‌ستانی لوبنانی داوایان له ئه‌نجومه‌نی ئاسایش کردووه‌ ده‌ست به‌جێ هه‌ڵوێست له پێناو ڕاگرتنی ئه‌و هێرشانه‌دا وه‌ربگرێت.

به‌ڕێز موحه‌ممه‌د گوتیشی کۆمه‌ڵگای نێونه‌ته‌وه‌یش بانگهێشت کراوه‌ که‌ ده‌ستبه‌جێ بڕیارێکی ڕوون و ئاشکرا بۆ ئاگربه‌ستێکی یه‌کسه‌ری بدات. هه‌روه‌ها ئه‌و گه‌مارۆ ئاسمانی و ده‌ریاییانه ‌لاببرێت که له‌سه‌ر لوبنان دانراون‌.

باڵیۆزی ئیسرائیلیش له نه‌ته‌وه‌ یه‌کگرتووه‌کان، دان گلێرمان، به‌ ئاشکراییه‌وه‌ گوناهبارییه‌کانی لوبنانی ڕه‌ت کرده‌وه ‌و گوتی لوبنان وه‌ڵامی ئه‌و پشتیوانیه‌ی ده‌درێته‌وه‌ که له حیزب الله‌ ی سه‌ر به‌ ئێران ده‌یگرێت بۆ به‌کارهێنانی خاکی لوبنانی وه‌ک بنکه‌یه‌کی ئه‌نجامدانی ئه‌و هێرشانه‌ی ده‌کرێنه‌ سه‌ر ئیسرائیل. هه‌روه‌ها گوتی زۆربه‌ی ئه‌و موشه‌کانه‌ی بۆ شارۆچکه‌ ئیسرائیلیه‌کان هه‌ڵده‌درێن، زۆربه‌یان له ماڵانه‌وه‌ هه‌ڵدراون که خێزانیان تیادا بووه‌ و ئه‌مه‌ش نیشانه‌یه‌که‌ بۆ ئه‌وه‌ی حیزب الله‌ که‌سانی سیڤیڵ بۆ شاردنه‌وه‌ی کرداره‌کانی خۆیان به‌کارده‌هێنن و هیچ ڕێزێکیان بۆ ژیانی مرۆڤایه‌تی دانه‌ناوه‌.

جۆن بۆڵتن ی نوێنه‌ری ئه‌مریکاش له ئه‌نجومه‌نی ئاسایش گوتی "پشتگیری زۆری ئێران له حیزب الله‌ زۆر چاک زانراوه‌ و بۆ ماوه‌ی چه‌ندین ساڵه‌ به‌رده‌وامه. ئێمه‌ داوا له سوریا و ئێران ده‌که‌ین ده‌ستبه‌جێ پشتگیری و یارمه‌تیه‌کانیان له گروپه‌ تیرۆرستیه‌کان ڕابگرن و به‌ تایبه‌تی بۆ حیزب الله‌ و حه‌ماس"‌.

ئه‌نجومه‌نی ئاسایش پاش کۆبونه‌وه‌که‌ی ڕۆژی هه‌ینی، به‌یاننامه‌یه‌کی کورتی بڵاوکرده‌وه‌ و تیایدا ڕایانگه‌یاندووه‌ که چاوه‌ڕێی ڕاپۆرتێکی ئه‌و شانده‌ دیپلۆماتیه‌ ده‌که‌ن که له لایه‌ن سکرێتیری گشتی نه‌ته‌وه‌ یه‌کگرتووه‌کان کۆفی ئه‌نانه‌وه ‌بۆ ناوچه‌که‌ ده‌نێرێن. ئه‌ندامانی ئه‌و شانده‌یه‌ش سێ ڕاوێژکاری سیاسی باڵای به‌ڕێز ئه‌نانیان تیادایه‌. دیپلۆماتانی ئه‌نجومه‌نی ئاسایشیش ده‌ڵێن پلانیان بۆ ئه‌نجامدانی هیچ جۆره‌ کردارێکی تر دانه‌ناوه‌.

XS
SM
MD
LG