Accessibility links

یاسادانه‌رێکی ئه‌مریکی به‌ڵێن به‌ لێکۆڵینه‌وه‌ له‌سه‌ر ڕووداوێکی له‌شکری له عێراق ده‌دات


یاسادانه‌رێکی ئه‌مریکی سه‌ر به‌ کۆمارییه‌کان ده‌ڵێت له کۆنگرس کۆبونه‌وه‌‌یه‌کی تایبه‌ت به‌ ڕووداوێکی عێراق ئه‌نجام ده‌دات که‌ تیایدا سه‌ربازه‌ ئه‌مریکیه‌کان گوناهبارکراون به‌وه‌ی خه‌ڵکی سیڤیڵی بێ چه‌کیان کوشتووه‌.

سه‌رۆکی کۆمیته‌ی کاروباری له‌شکری له ئه‌نجومه‌نی نوێنه‌ران، ده‌نکن هه‌نته‌ر گوتویه‌تی دوو لێکۆڵینه‌وه‌ی له‌شکری سه‌باره‌ت به‌و ڕووداوه‌ی مانگی یانزده‌ی ڕابردووی شارۆچکه‌ی حه‌دیسه‌ی عێراق له ئارادایه‌.

هه‌نته‌ر ده‌ڵێت به‌ پێی لێکۆڵینه‌وه‌ له‌شکرییه‌کان، کۆمیته‌که‌ی چه‌ند کۆبونه‌وه‌یه‌ک ئه‌نجام ده‌دات و تیایدا تێبینی و تێڕوانینی کۆنگرس سه‌باره‌ت به‌و ڕووداوانه‌ ده‌خه‌نه ڕوو.

ئه‌م تێبینیانه‌ی به‌ڕێز هه‌نته‌ر له پاش دوو ڕۆژ له ڕاگه‌یاندنه‌کانی یاسادانه‌ر جۆن مه‌رثا ی سه‌ر به دیموکراته‌کان هات که‌ گوتبووی هێزی مارینزی ئه‌مریکی له‌ میانه‌ی وه‌ڵامدانه‌وه‌یان بۆ ته‌قینه‌وه‌ی بۆمبێکی لاڕێ له حه‌دیثه، چونه‌ته‌ ناو ماڵێکی ئه‌و شارۆچکه‌یه‌ و له ئه‌نجامدا 24 که‌سی سیڤیڵیان کوشتووه‌.

به‌ڕێز مه‌رثا گوتوشیه‌تی له‌وانه‌یه‌ نیگه‌رانی ئه‌و مارینزانه‌ له‌ به‌رامبه‌ر کوشتنی هاوڕێکانیان له‌و ڕووداوی ته‌قینه‌وه‌ی بۆمبه‌دا، بووبێته هانده‌رێک بۆ کوشتنی ئه‌و کۆمه‌ڵه‌ سیڤیڵه‌.

XS
SM
MD
LG