Accessibility links

پشکنه‌رانی ئاژانسی IAEA سه‌ردانی ده‌زگا ناوه‌کیه‌کانی ئێران ده‌که‌ن


پشکنه‌رانی ئاژانسی چاودێری ووزه‌ی ئه‌تۆمی نه‌ته‌وه‌ یه‌کگرتووه‌کان له ئێرانن تاوه‌کو سه‌ردانی دوو ده‌زگای سه‌ره‌کی ووزه‌ی ناوه‌کی وڵاته‌که‌ بکه‌ن.

کاربه‌ده‌ستان ڕۆژی شه‌ممه‌ له تاران ئاماژه‌یاندا به‌وه‌ی که پشکنه‌ره‌کان سه‌ردانی ده‌زگای پیتاندنی یۆرانیۆم له ئه‌سفه‌هان و ناتانز ده‌که‌ن. ئه‌م سه‌ردانه‌ش پێش گه‌شته‌که‌ی موحه‌ممه‌د ئه‌لبه‌رادعی سه‌رۆکی ڕێکخراوی بۆ ئێران له‌م هه‌فته‌یه‌دا دێت که به‌ نیازی ووتوێژکردن له‌گه‌ڵ کاربه‌ده‌ستانی ئێرانیدا ئه‌نجامی ده‌دات.

ئه‌لبه‌رادعی ڕاپۆرتێک له‌سه‌ر پابه‌ندی به‌رنامه‌ی ناوه‌کی ئێران به‌ مه‌رجه‌کانی ئه‌نجومه‌نی ئاسایشی ن. ی ئاماده‌ ده‌کات. ئه‌نجومه‌نی ئاسایش پێشتر داوای له تاران کردووه‌ چالاکیه‌کانی پیتاندنی یۆرانیۆم ڕابگرێت که له‌وانه‌یه‌ بۆ به‌رهه‌مهێنانی سوته‌مه‌نی ده‌زگاکانی ووزه‌ی ناوه‌کی و چه‌کی ناوه‌کی به‌کاربهێنرێت.

جێی باسه‌، ئێران ڕازی نی‌‌‌یه‌ به‌ جێبه‌جێکردنی ئه‌و مه‌رجانه‌ و ده‌ڵێت به‌رنامه‌ ناوه‌کیه‌که‌یان ته‌نها بۆ مه‌به‌ستی ئاشتیخوازانه‌یه‌. واشنتۆنیش ده‌ڵێت کۆماری ئیسلامی ئێران هه‌وڵی دروستکردنی چه‌کی ناوه‌کی ده‌دات.

XS
SM
MD
LG