له به‌غدا هێرش کراوه‌ته‌ سه‌ر ئه‌و شیعانه‌ی له که‌ربه‌لاوه‌ گه‌ڕاونه‌ته‌وه‌

چه‌کداران له خۆرئاوای به‌غدا هێرشیان کردۆته‌ سه‌ر ئه‌و حاجیه‌ شیعانه‌ی که له‌ شاری که‌ربه‌لاوه‌ گه‌ڕابونه‌وه‌ پاش ئه‌وه‌ی ئاماده‌ی مه‌راسیمی ئه‌ربه‌‌عینیه‌ی حوسه‌ین بوون.

پۆلیسی عێراقی ده‌ڵێت دوو شیعه‌ گیانیان له ده‌ستداوه‌ و ده‌یان که‌سی دیکه‌ش بریندار بوون کاتێک که چه‌کداران ته‌قه‌یان له‌و پاس و که‌میونه‌ کردووه‌ که‌ حاجیه‌کانی تیادا بووه‌.

چه‌کداران بۆسه‌شیان بۆ ئه‌و پۆلیسانه‌ دانا که‌ به‌ره‌و شوێنی ڕوداوه‌که‌ به‌ ڕێکه‌وتبوون و له ئاکامدا دوو ئه‌فسه‌ری پۆلیسیش کوژران.

له لایه‌کی تریش، پۆلیسی عێراقی ڕۆژی چوارشه‌ممه‌ ته‌رمی به‌ لایه‌نی که‌مه‌وه‌ شه‌ش که‌سیان دۆزیوه‌ته‌وه‌ که له سه‌ر یه‌کێک له شه‌قامه‌کانی پایته‌خت فڕێدرابوون و باوه‌ڕده‌کرێت ئاکامی پێکدادانێکی نوژادی نێوان شیعه‌کان و سونه‌کان بووبن.