تەرمى ئەو كچەى كەسێ مانگ لەمەوبەر لەقەزاى خانەقین ى پارێزگاى دیالە دۆزرایەوە ، تا ئێستا لەپزیشكى دادوەریە و كەس و كارەكەى نەرۆیشتوون بۆ بردنەوەى .
سێ مانگ لەمەوبەر لەگەڕەكى بەختیارى قەزاى خانەقین تەرمى كچێكى تەمەن نزیكەى 21 ساڵ لەنێو زێراب دا دۆزرایەوە ، كەبەشێوەیەكى دڕندانە كوژرابوو، ناسنامەى دیار نیە و بكوژەكانیش ئاشكرانەبوون.
عەقید لەمیعە محەمەد بەرێوەبەرى بەرێوەبەرایەتى بەرەنگاربونەوەى توندوتیژى دژ بەژنان، بەدەنگى ئەمەریكاى ڕاگەیاند"كەس نازانێت كچە كوژراوەكە كێ یە و بۆچى كوژراوە و كێ كوشتویەتى."
وتیشى"تەرمەكەى لەپزیشكى دادوەریە و خاوەنەكەى دیارنیە، پۆلیسیش لەلێكۆڵینەوەى بەردەوامدایە."
لاى خۆشیەوە رائید ئەشرەف قاسم ئەفسەر لەپۆلیسى خانەقین، بەدەنگى ئەمەریكاى راگەیاند"كچە كوژراوەكە پێناچێت خەڵكى خانەقین بێت ئەگینا دەدۆزرایەوە، رەنگە خەڵكى بەغداو ناوچەكانى ترى عێراق بێت و لەخانەقین كوژرابێت و فرێ درابێت."
هەرچەندە رێكخراوەكانى بوارى ژنان بەردەوام كار لەسەر هۆشیاركردنەوەى كۆمەڵگا دەكەن بەرانبەر مافەكانى ژنان، بەڵام هێشتا دیاردەى توندوتیژى بەرانبەر ژنان بەردەوامى هەیە
.