Accessibility links

داعش هەڵمەتێكى بۆ كوشتنى موختارى گوندەكانى دیالە دەستپێكردووە


گروپە چەكدارە توندرەوەكانى ناوچە كوردستانیەكانى پارێزگاى دیالە كە گومان دەكرێت سەربە داعش بن، هەڵمەتێكیان بۆ كوشتنى موختارى گوندە عەرەب نیشینەكان دەستپێكردووە و لەماوەى چەند مانگى ڕابردوودا چەندین موختاریان كوشتووە.

لیوا مەردان چاوشین فەرماندەى میحوەرى قەرەتەپەى پێشمەرگە لەپارێزگا دیالە، بەدەنگى ئەمەریكاى ڕاگەیاند"دوو ڕۆژ لەمەوبەر داعش موختارى گوندى جەرایات و كوڕەكەیان ڕفاندووە و هەردوكیان پێكەوە كوشتووە."

پێشتریش مەفرەزەیەك چەكدار هەڵیانكوتایە سەر دوو گوندى دەوروبەرى ناحیەى قەرەتەپە ، لەگوندێكیاندا 5 موختار و كەسایەتى و لەگوندەكەى تریشیان موختارێكى كوشتووە.

لیوا مەردان ، هۆكارى بەئامانج كردنى موختارى گوندەكانى بۆ ئەوە گێرایەوە كە داعش وا لەموختارەكان دەڕوانێت پەیوەندیان لەگەڵ دەزگا ئەمنیەكاندا هەیە، بەو پێیەى موختار مۆرى پێیە و جۆرێك لەئیمتیازاتى هەیە.

بەوتەى فەرماندەكەى پێشمەرگە، داعش لەرێگەى ترس و تۆقاندن و كوشتنى موختارەكانەوە ، دەیەوێت كەشێكى وا دروست بكات كەس نەوێرێت زانیاریان لەسەر بداتە دەزگا ئەمنیەكان.

پێشتر داعش بەشێك لەشارو شارۆچكەكانى پارێزگاى دیالەى لەژێر كۆنترۆڵدا بوو ، بەڵام دواى لەدەستدانى ئەو ناوچانە، لەئێستادا مەفرەزەى بچوك بچوكى چەكدار بەگوندەكاندا بڵاو بونەتەوە و بەوتەى دەزگا ئەمنیەكانیش ئەو مەفرەزانە سەر بەداعشن


.

XS
SM
MD
LG