تا ئێستا ناسنامەى ئەو كچە كوژراوە نەدۆزراوەتەوە و بكوژەكەى ئاشكرا نەبووە، كە چەند رۆژێك لەمەوبەر تەرمەكەى لەقەزاى خانەقینى پارێزگاى دیالە دۆزرایەوە ، بەڵام بەرپرسانى پۆلیس دەڵێن"كچەكە بە بەرد و بلۆك كوژراوە."
كچە كوژراوەكە تەمەنى لەنێوان 18 بۆ 22 ساڵیدایە و تائێستا ناسنامەى خۆى و كەس و كارەكەى و بكوژەكەشى ئاشكرا نەبووە ، تەرمەكەشى بۆ توێكارى پزیشكى رەوانەى شارى باقوبەى ناوەندى پارێزگاى دیالە كراوە.
عەقید لەمیعە محەمەد بەرێوەبەرى بەرەنگاربونەوەى توندوتیژى دژ بە ژنان لەگەرمیان، بەدەنگى ئەمەریكاى راگەیاند"دواى كوژرانى كچەكە بەبەرد و بلۆك ، تەرمەكەشى فرێدراوەتە نێو زێرابەوە."
چەند رۆژێك لەمەوبەریش ژنێكى تر لەقەزاى خورماتوى پارێزگاى سەڵاحەدین كوژرا و رێژەى توندوتیژى دژ بە ژنان و كچان لەناوچە جێناكۆكەكان بەرزترە بەرارود بەناوچەكانى ترى هەرێم ، ئەمەش بەوتەى چالاكوانانى بوارى ژنان.
رائید ئەشرەف قاسم ئەفسەر لەپۆلیسى خانەقین، بەدەنگى ئەمەریكاى راگەیاند"هێشتا ناسنامەى ئەو كچە ئاشكرا نەبووە كە تەرمەكەى فرێدراوە و كەسیش سكاڵاى یاسایى تۆمار نەكردووە."
زیادبونى حاڵەتەكانى توندوتیژى بەرانبەر بە ژنان لەناوچە كێشەلەسەرەكان، لەكاتێكدایە رێكخراوەكانى ژنان لەبەر بارودۆخى ئەمنى لەرابردوودا نەیانتوانیوە وەكو پێویست لەهەندێك لەو ناوچانە كاربكەن.