Accessibility links

لە زانکۆیەکی ئەمەریکا بەهۆی هێرشێـکەوە 8 کەس بە ئۆتۆمبیل و چەقۆ بریندار دەبن

  • VOA News

کاربەدەسـتان دەڵێن کەسێـک ئەمڕۆ دووشەممە لە زانکۆی ئۆهایۆ ستەیت لە شاری کۆڵەمبسی ویلایەتی ئۆهایۆ بە ئۆتۆمبیل خەڵکی کردووە بە ژێرەوە و پاشان بە چەقۆ ژمارەیەکی دیکەی بریندارکردووە.

گوتەبێژی زانکۆکە و کەناڵی تەلەفیزیۆنی WBNS ی لە کۆڵەمبس دەڵێن پـۆلیس تەقەی لە کەسەکە کردووە و کوشتویەتی.

گەواهیدەران دەڵێن کەسەکە ئۆتۆمبیلێـکی SUV ی ڕەنگ سووری پـێبووە. بەڵام هێشتا هۆکاری هێرشەکە نازانرێت.

ڕێبـێـکا دایم خانمە گوتەبێژی بەڕێوەبەرایەتی فریاکەوتن لە کۆڵەمبس گوتی لەو هەشت بریندارە تەنها یەکێـکیان برینەکانی قورسە و چوار لە بریندارەکان ڕەوانەی ماڵەوە کراونەتەوە.

زانکۆکە خوێندنی بۆ ئەمڕۆ ڕاگرت و هێزەکانی پـۆلیس جادە و ڕێگەکانی نزیک زانکۆکەیان گرتووە.

جێی ئاماژەیە زانکۆی ئۆهایۆ ستەیت یەکێـکە لە زانکۆ گەورەکانی ئەمەریکا و نزیکەی 60 هەزار خوێندکاری هەیە.

XS
SM
MD
LG