Accessibility links

بەنگلادێش دوو ڕۆژ پرسەی نیشتمانی ڕادەگەیەنێت


لە ڕۆژی یەکشەممەوە بەنگلادێش دوو ڕۆژ پرسەی فەرمی دەگێڕێت بۆ ئەو قوربانییانەی گیانیان لەدەستدا بەهۆی هەڵکوتانی حەوت چەکداری توندڕەوی ئیسلامی بۆ سەر ڕێستورانتێکی باڵا و گرتنی چەند کەسێکی بیانی بەبارمتە. هەرچەندە هێرشەکەیان لەلایەن هێزەکانی پۆلیسەوە دوابەدوای 11 کاتژمێری شەڕ کۆتاییپێهات، بەڵام لە ئاکامدا 20 بارمتە کە زۆربەیان بیانیبوون و هەروەها دوو کارمەندی پۆلیس کوژران.

ڕێکخراوەی توندڕەوەی دەوڵەتی ئیسلامی بەرپرسیارێتی ئەنجامدانی هێرشەکەیان لە ئەستۆگرت هەرچەندە هێشتا هیچ پەیوەندییەکی ڕاستەوخۆ لە نێوان چەکدارەکان و دەوڵەتی ئیسلامی ئاشکرا نەبووە و کاربەدەسستانی حکومەتی بەنگلادێش نکوڵی لەوە دەکەن دەستی دەوڵەتی ئیسلامی تێدابێت.

ئەسەد زەمان خان وەزیری ناوخۆی وڵاتەکە ئەمڕۆ یەکشەممە ڕایگەیاند هێرشبەرەکان بەدڵنیاییەوە هیچ پەیوەندییەکیان بە دەوڵەتی ئیسلامییەوە نییە و بەڵکو ئەو جیهادیانە ئەندامی گروپی ناوخۆی ملیشیاکانی جەماعەتول موجاهدینی بەنگلادیشن کە زیاتر لە 10 ساڵە لە وڵاتەکەدا قەدەغەکراون. ناوبراو گوتیشی تێکڕای هێرشبەرەکان خۆیندەواربوون و لەبنەماڵەی دەوڵەمەندەوە بوون.

هاوکات ئاژانسی دەنگوباسی ڕۆیتەرز لەزاری بەرپرسی پۆلیسی نیشتیمانیەوە دەڵێت هەر 7 هێرشبەرەکە بنگلادێشیبوون و دەسەڵاتداران پێشتر هەوڵی دەستگیرکردنی 5 کەس لەوانەی دابوو.

کاربەدەستان دەڵێن لەنێو ئەو 11 پیاو 9 ژنەی کە لە ڕووداوەکەدا کوژران، 9 کەسیان ئیتالین، 7 ژاپۆنی، 2 بەنگلادێشی، هیندییەک و ئەمەریکاییەک. هێزەکانی ئاسایش 13 بارمتەیان ڕزگارکرد.

XS
SM
MD
LG