Accessibility links

هێرشى پێشمەرگە و حەشدى شەعبى بۆ سەر گوندى بەشیر


ئەمڕۆ هێزى پێشمەرگە و حەشدى شەعبى هێرشێكى فراوانیان بۆ گوندەكانى دەوروبەرى بەشیرى باشورى كەركوک ئەنجامدا و ژمارەیەک گوندیان كۆنترۆڵ كرد، بەڵام تا ئێستا چەكدارەكانى داعش لەناو گوندى بەشیردا ماون و بەرگریەكى بەهێز دەكەن.

عەمید روكن هەورامان محەمەد جێگرى فەرماندەى هێزەكانى پشتیوانى دووى پێشمەرگە، بەدەنگى ئەمەریكاى ڕاگەیاند "پلانەكە بەو شێوەیە بوو كە گوندى بەشیر گەمارۆ بدەین، كە پێشمەرگە لەدیوى باكورى ڕۆژهەڵاتەوە گوندەكانى زراعە و ئیمام رەزا و ئەلبومەفرەجى كۆنترۆڵكردووە".

گوتیشی "لەدیوى باشوریشەوە حەشدى شەعبى پێشڕەوى كردووە."

بەپێى زانیاریەكانى دەنگى ئەمەریكا، پێشمەرگە و حەشدى شەعبى دەیانەوێت ڕاستەوخۆ نەچنە نێو گوندى بەشیرەوە ، چونكە گوندەكە داعشى تێدایە و بەتەواوەتیش مینڕێژكراوە، بۆیە دەیانەوێت پلانى چوونە نێو بەشیر بەلەسەرخۆیى جێبەجێ‌ بكەن.

بەتایبەت كە ئەمڕۆ داعش لەرێگەى هاوەنبارانكردنى حەشد و پێشمەرگەوە بەرگریەكى بەهێزى لەگوندى بەشیر كرد و ئەو بەرگریە وایكرد پێشرەویەكان بەهێواشى ئەنجام بدرێن.

لیوا رەمەزان دیكۆنى فەرماندەى پێشمەرگە، بەدەنگى ئەمەریكاى راگەیاند"پێشمەرگە تەواو لە بەشیر نزیكبووەتەوە."

هێرشەكەى ئەمرۆى پێشمەرگە و حەشدى شەعبى بۆ بەشیر ، لەكاتێكدایە بەدرێژایى شەوى رابردوو فرۆكەكانى هاوپەیمانان ئەو گوندەیان بۆمب باران كردووە و فرۆكە عێراقیەكانیش بەردەوامن لە بۆمب بارانكردنى.

هەندێك لەبەرپرسانى پێشمەرگە، حەشدیان تۆمەتباركرد بەوەى كە ئەوان لەنزیك سەنگەرەكان ماونەتەوە و پێچەوانەى رێكەوتنەكەى نێوانیان ، شان بەشانى پێشمەرگە نەیانتوانیووە پێشرەوى بكەن.

بەڵام نەجات حسێن فەرماندەى حەشدى شەعبى ئەوەى رەتكردەوە و بەدەنگى ئەمەریكاى راگەیاند"حەشد شان بەشانى پێشمەرگە پێشرەوى كردووە."

گوندى بەشیر گەورەترین گوندى پارێزگاى كەركوكە كە دانیشتوانەكەى توركمانى شیعەن ، تائێستا حەشد چەندین جار هەوڵى كۆنترۆڵكردنى داوە بەڵام شكستى هێناوە بۆیە ئەمرۆ بەهەماهەنگى پێشمەرگە هەوڵەكانیان بۆ كۆنترۆڵكردنەوەى چرِ كردەوە.

XS
SM
MD
LG