فەرماندەى میحوەرى ڕۆژئاواى كەركوكى هێزى پێشمەرگە، هەموو ئەو زانیاریانە ڕەتدەكاتەوە كە باس لە ئەنجامدانى چالاكى هێزەكانى ئەمەریكا و دژەتیرۆر دەكەن لەرێگەى فڕۆكەوە لەناو حەویجە و دەوروبەرى.
كەمال كەركوكى ، بەدەنگى ئەمەریكاى ڕاگەیاند"هەموو ئەو زانیارییانەى ڕاگەیاندنەكان لەبارەى دابەزینى هێزى ئەمەریكى و دژەتیرۆر لە رێگەى فرۆكەوە بۆ ناو حەویجە بڵاویان كردووەتەوە راست نین."
وتیشى"فرۆكە لە هیچ ناوچەیەكى حەویجە دانەبەزیووە و یەك بەرپرسى داعشیش دەستگیرنەكراوە."
بەڵام عەمید ڕوكن هەورامان محەمەد جێگرى فەرماندەى گشتى هێزەكانى پشتیوانى دووى سەربە وەزارەتى پێشمەرگە، بەدەنگى ئەمەریكاى ڕاگەیاند"ئەو چالاكییانەى هێزەكانى ئەمەریكا و دژە تیرۆر لە ڕێگەى دابەزینى فڕۆكەوە لەدەوروبەرى حەویجە ئەنجامى دەدەن داعشى تەواو شپرزە كردووە."
گوتیشى"داعش چەكى قورسى لەسەر بارەگا هەستیارەكانیان جێگیر كردووە بۆ ئەوەى لەحاڵەتى دابەزینى فڕۆكەدا بەرگرى بكەن ، هەروەها بەرپرسەكانیشیان هاتووچۆ كردنیان كەم كردووەتەوە."
ڕاگەیاندنە كوردیەكان بڵاویانكردەوە كەلەماوەى هەفتەى ڕابردوودا فڕۆكەى ئەمەریكى و هێزى دژە تیرۆر چەندین چالاكى دابەزینیان بۆ سەر بارەگاكانى داعش ئەنجامداوە، بەڵام هێزە ئەمنیە كوردیەكان تەنها ئەو چالاكى یە یان پشت راستكردووەتەوە كە تێیدا ژمارەیەک زیندانى عەرەبى خەڵكى حەویجە ئازادبوون.