هەرچەندە ئێوارەی ڕۆژی هەینی وەفدى كورد و حەشدى شەعبى لەسەر هێوركردنەوەى بارودۆخى خورماتوو رێككەوتن ، بەڵام ڕۆژی شەممە گرژى و ئاڵۆزى جارێكى تر لەو قەزایە دروست بۆوە و چەند كەسێك برینداربوون.
كەریم شكور بەرپرسى بازنەى حەمرین ى یەكێتى، بەدەنگى ئەمەریكاى راگەیاند"هەرچەندە سەركردایەتى كورد و شیعە لەگەڵ هێوركردنەوەى دۆخەكەدان ، بەڵام بارودۆخى خورماتوو تەقیوەتەوە و لەدەست دەرچووە و مەسەلەكە بووەتە شەرِى كۆڵان بەكۆڵان."
دوێنێ هەینى وەفدى كورد و حەشدى شەعبى لەسەر هێوركردنەوەى دۆخى خورماتوو و قەرەبووكردنەوەى زیانلێكەوتوان و پێكهێنانى هێزێكى هاوبەش بۆ رێگرى كردن لەدروستبوونى پشێوى رێككەوتن.
محەمەد فایەق بەرپرسى راگەیاندنى قایمقامیەتى خورماتوو، ئاماژەى بەوەكرد لەهەردوولا ئاژاوەگێر بوونیان هەیە و ئەو ئاژاوە گێرانە گرژى دروست دەكەن بۆیە دۆخەكە هێور نابێتەوە، ئەگینا وەفدى باڵا لەبەغداوە هاتوونەتە خورماتوو بەردەوامن لەهەوڵەكانیان بۆ هێوركردنەوەى دۆخەكە.
لەماوەى سێ رۆژى رابردوودا لەخورماتوو 18 كەس لەكورد و توركمانى شیعە كوژراون و پێشمەرگە و حەشدى شەعبى ژمارەیەكى زۆر خەڵكیان لەیەكترى دەستگیركردووە، كەیەكێك لەدەستگیركراوەكانى لاى پێشمەرگە فەرماندەیەكى باڵاى حەشدى شەعبى یە.
دەقی ڕاپۆرتەکەی دڵشاد ئەنوەر