Accessibility links

سه‌دان خێزانی کرستیان له‌ ده‌ستی داعش هه‌ڵدێن


سه‌دان خێزانی کرستیان له‌ شارۆچکه‌یه‌کی ناوه‌ڕاستی سوریا هه‌ڵاتوون له‌ کاتێکدا توندڕه‌وانی ده‌وڵه‌تی ئیسلامی به‌ره‌و شارۆچه‌که‌که‌ پێشڕه‌وی ده‌که‌ن.

له‌ ڕۆژی شه‌ممه‌ ئوسامه‌ ئێدوارد به‌ڕێوه‌به‌ری تۆڕی ئاشوری کرستیان بۆ مافه‌کانی مرۆڤ له‌ سوریا ڕایگه‌یاند سه‌دان خێزان له‌ شارۆچکه‌ی سه‌دادی زۆرینه‌ کرستیان هه‌ڵاتوون به‌ره‌و ناوه‌ڕاستی حومس و دیمه‌شقی پایته‌خت که‌ ژێر ده‌ستی هێزه‌کانی حکومه‌تدان.

چالاکوانی بنکه‌ له‌ سوریا به‌بارس ئه‌لتالاوی به‌ ئاژانسی ئه‌سۆسیه‌یتت پرێسی ڕاگه‌یاندووه‌ شه‌ڕو پێکدادانی سه‌خت ڕۆژی شه‌ممه‌ له‌ نزیک شارۆچکه‌ی قه‌ریه‌ته‌ین ڕوویدا که‌ هێزه‌کانی داعش ڕۆژی پێنجشه‌ممه‌ ده‌ستیان به‌سه‌ردا گرت. قه‌ریه‌ته‌ین نزیکه‌ی 25 کیلۆمه‌تر دووره‌ له‌ سه‌داده‌وه‌.

ئه‌م هێرشه‌ش هاوکاته‌ له‌گه‌ڵ تێپه‌ڕبوونی ساڵێک به‌سه‌ر هێرشه‌کانی ئاسمانی هاوپه‌یمانان به‌ ڕێبه‌رایه‌تی ئه‌مه‌ریکا دژ به‌ توندڕه‌وان له‌ عێراق.

هێزی هاوپه‌یمانان به‌ڕێبه‌رایه‌تی ئه‌مه‌ریکا نزیکه‌ی 6 هه‌زار هێرشی ئاسمانی دژ به‌ گروپی داعش ئه‌نجام داوه‌ و هه‌روه‌ها ئۆپه‌راسیۆنه‌کانی بۆ ناو سوریاش په‌ره‌پێداوه‌.

به‌ڵام ساڵێک پاش ئه‌وه‌ش داعش هێشتا توانای هێرش کردنی له‌سه‌رانسه‌ری ئه‌و خه‌یلافه‌ته‌ی که‌ خۆی ڕایگه‌یاندووه‌ هه‌یه‌. سه‌ره‌ڕای ئه‌وه‌ی چه‌ند ناوچه‌یه‌ک له‌لایه‌ن کورده‌کان و هێزی هاوپایمانانی عێراقی کۆنتڕۆڵ کراوه‌ته‌وه‌.

XS
SM
MD
LG