فەرماندەى فیرقەى 3 ى سوپاى عێراق كە پلەدارێكى باڵاى كوردە، ئامادە نیـیە بچێتە بەردەم ئەو لیژنەیەى پەرلەمانى عێراق كە پێكیهێناوە بۆ لێكۆڵینەوە لە هۆكارەكانى كەوتنى موسڵ و دەڵێت"ئەگەر بچمە بەغدا دەستگیردەكرێم ، بۆیە رەتمكردووەتەوە بچمە بەردەم لیژنەكە."
عەمید روكن هیدایەت عەبدولڕەحیم ، بە دەنگى ئەمەریكاى راگەیاند" لە كۆى 10 فەرماندەى فیرقەکە تەنها من سزادراوم ، بۆیە بە بڕیارى سیاسى نەبێت ناچمە بەردەم لیژنەكەى پەرلەمانى عێراق."
دەربارەى ئەو تۆمەتانەى لەلایەن حكومەتى عێراقیەوە ئاڕاستەى كراون ، عەمید ڕوكن هیدایەت وتى"مالیكى وا تێگەیەنراوە گوایە من بە بڕیارى هەرێم لە موسڵ شەڕى شیعەم كردووە و پشتیوانى داعش و سونـنە بوون."
لاى خۆشیەوە ئەمین بەكر ئەندامى ئەنجومەنى نوێنەرانى عێراق ، بە دەنگى ئەمەریكاى ڕاگەیاند"بانگكردنى فەرماندە كوردەكەى فیرقەى 3 ى سوپاى عێراق هێندە مەسەلەیەكى سیاسیە هێندە یاسایى نیە."
هەرچەندە عەمید ڕوكن هیدایەت لەلایەن مالكیەوە بڕیارى دەستگیركردنى بۆ دەركراوە ، بەڵام مالیكى خودى خۆشى یەكێكە لەو بەرپرسانەى لەسەر كەوتنى موسڵ لێكۆڵینەوەى لەگەڵ دەكرێت.