Accessibility links

داعش لە سنوورى كەركوک و خورماتوو هێز كۆدەكاتەوە و گومان هەیە لە جەژندا هێرش بکات


داعش لە ناوچەكانى خۆرئاوا و باشورى كەركوک و قەزاى خورماتوو هێز كۆدەكاتەوە و فەرماندەكانى هێزى پێشمەرگەش گومان دەكەن كە داعش نیازى هێرشكردنى هەبێت لە ڕۆژانى جەژندا، بۆیە هێز كۆدەكاتەوە.

عەبدڵا بۆر فەرماندەى میحوەرى خورماتووى هێزى پێشمەرگە، بە دەنگى ئەمەریكاى ڕاگەیاند"داعش لە زۆربەى میحوەرەكان هێز كۆدەكاتەوە و پێدەچێت پلانى هێرشكردنى هەبێت."

ناوبراو دەڵێت" لە هەندێک جێگە داعش هێزى كۆكردووەتەوە و فڕۆكەكانى هاوپەیمانان بەچڕى بۆردومانیانی كردوون."

كۆكردنەوەى هێز لەلایەن داعشەوە لە سنورى كەركوک و داقوق و خورماتوو ، لە كاتێكدایە لە ماوەى هەفتەى رابردوودا داعش ژمارەیەک هێرشى بۆ سەر سەنگەرەكانى پێشمەرگە ئەنجامداوە و لەو هێرشانەدا تێكشكێنراوە.

سۆران جەلال بەڕێوەبەرى پۆلیسى فریاكەوتنى ناحیەى تازەى باشورى كەركوک، بە دەنگى ئەمەریكاى راگەیاند" لە بەرامبەر كۆكردنەوەى هێزدا لەلایەن داعشەوە ، هێزى پێشمەرگە ئامادەكارى پێویستى بۆ بەرەنگاربوونەوەى داعش لە ڕۆژانى جەژندا كردووە."

شان بەشانى هێزى پێشمەرگە فڕۆكەكانى هاوپەیمانان لە ئامادەباشیدان و بۆ ئەوەى لە كاتى پێویستدا چەكدارەكانى داعش لە سنورى كەركوک و خورماتوو بۆردومان بكەن.

XS
SM
MD
LG