Accessibility links

بەهۆى حەشدى شەعبى هاوپەیمانان هاوكاریكردنى پێشمەرگە بۆ گرتنەوەى گوندى بەشیر رەتدەكەنەوە


هێزەكانى هاوپەیمانان هاوكاریكردنى هێزى پێشمەرگە رەتدەكەنەوە بۆ دەرهێنانى گوندى بەشیرى باشورى خۆرئاواى كەركوک لە بن دەستى داعش و هۆكارەكەشى بۆ بوونى هێزەكانى حەشدى شەعبى لە دەوروبەرى ئەو گوندە دەگێرنەوە.

لیوا محەمەد قادر فەرماندەى هێزەكانى پێشمەرگە لە باشورى كەركوک بە دەنگى ئەمەریكاى راگەیاند"مەرجى هێزەكانى هاوپەیمانان بۆ هاوكاریكردنمان بۆ كۆنترۆڵكردنى گوندى بەشیر دوور كەوتنەوەى چەكدارەكانى حەشدى شەعبیـیە لەو گوندە."

ناوبراو دەڵیت"هێزەكانى حەشدى شەعبیش بەبیانووى ئەوەى شەهیدیان داوە ئامادە نین سنوورى بەشیر جێبهێڵن."

گوندى بەشیر گوندێكى توركمانى شیعە نیشینە، كە هێزێكى گەورەى حەشدى شەعبى ماوەى زیاتر لە 6 مانگە لە شەڕدایە لەگەڵ داعش، بەڵام هەتا ئێستا گوندەكەى پـێ‌كۆنترۆڵ نەكراوە، لە كاتێكدا زیاتر لە 100 چەكداریان لێكوژراوە.

لیوا محەمەد قادر، ئاماژەى بەوەكرد ناكرێت گوندى بەشیر لە ژێر كۆنترۆڵى داعشدا بمێنێتەوە، بۆیە دواى تەواوبوونى جەژن چارەسەرێک بۆ كێشەى ئەو گوندە دەدۆزنەوە.

هێزەكانى پێشمەرگە نیگەرانن لە حەشدى شەعبى بەهۆى ئەوەى كە گوندەكەیان لەبن دەستى داعش پێ‌ دەرناهێنرێت و ئامادەش نین ناوچەكە جێبهێڵن هەتا هێزى پێشمەرگە بە هەماهەنگى هاوپەیمانان ئەو گوندە كۆنترۆڵ بكات.

XS
SM
MD
LG