Accessibility links

توندڕه‌وانی ئیسلامی ئۆردوگای یه‌رموک کۆنتڕۆڵ ده‌که‌ن


ڕێکخراوی سوریایی بۆ چاودێری مافه‌کانی مرۆڤ ده‌ڵێت له‌ ئێستادا توندڕه‌وانی ده‌وڵه‌تی ئیسلامی ده‌ستیان گرتووه‌ به‌سه‌ر به‌شێکی زۆری ئۆردوگا گه‌وره‌که‌ی په‌نابه‌رانی فه‌له‌ستینی که‌ ده‌که‌وێته‌ ده‌وروبه‌ری دیمه‌شقی پایته‌ختی سوریاوه‌.

له‌ ڕاپۆرته‌که‌ی ئه‌م ڕێکخراوه‌دا که‌ ئه‌مڕۆ شه‌ممه‌ بڵاو کراوه‌ته‌وه‌ هاتووه‌ توندڕه‌وانی ده‌وڵه‌تی ئیسلامی هه‌روه‌هاش به‌ره‌ی ئه‌لنوسڕه‌‌ که‌ لقی ئه‌لقاعیده‌یه‌ له‌ سوریا توانیویانه‌ ده‌ستبگرن به‌سه‌ر له‌ سه‌دا 90 ی ئۆردوگای یه‌رموک بۆ په‌نابه‌ران.

ده‌وڵه‌تی ئیسلامی و به‌ره‌ی ئه‌لنوسڕه‌ پێکڕا شه‌ڕی سه‌ر‌هه‌ڵداوانی تریان ده‌کرد واتا ئه‌وانه‌ی دژی حکومه‌تی سوریان.

وه‌ک کاربه‌ده‌ستانی نه‌ته‌وه‌ یه‌کگرتووه‌کان ده‌ڵێن بێ له‌و شه‌ڕه‌ زه‌مینیانه‌ی ڕوویانداوه‌ هێزه‌ سه‌ربازییه‌کانی سوریا تۆپبارانی ئۆردوگاکه‌ی کردووه‌.

به‌هۆی توندوتیژییه‌کانی هه‌فته‌ی ڕابردووه‌وه‌ له‌و ئۆردوگایه‌دا نزیکه‌ی هه‌ژده‌ هه‌زار که‌سی سیڤیل که‌ ژماره‌یه‌کی به‌رچاویان منداڵن له‌ ناو ئۆردوگاکه‌دا گیریانخواردووه‌.

وڵاته‌ یه‌کگرتووه‌کانی ئه‌مه‌ریکا ناڕه‌زایی ده‌ربڕیوه‌ به‌رامبه‌ر به‌م هێرشکردنه‌ بۆ سه‌ر ئۆردوگای یه‌رموک و ده‌ڵێت ئه‌م کارانه‌ی ده‌وڵه‌تی ئیسلامی و هاوپه‌یمانه‌کانیشی مه‌ترسیه‌کی ئێجگار گه‌وره‌ن بۆ سه‌ر خه‌ڵکی سیڤیل که‌ ماوه‌ی دوو ساڵه‌ له‌ ژێر گه‌مارۆدان پێویستییه‌کی زۆریان به‌ خواردن و که‌ره‌سته‌ی ته‌ندروستی هه‌یه‌ هه‌روها به‌ پێداویستییه‌کانی تریش.

XS
SM
MD
LG