Accessibility links

کەرکوک: داعش ژمارەیەک گوند بەجێدەهێڵێت و پێشمەرگە کۆنترۆڵیان ده‌کات


چەکدارەکانى داعش ژمارەیەک گوندیان لە خۆرئاوا و باشورى کەرکوک بەجێهێشتووە و هێزەکانى پێشمەرگە ڕۆیشتوونەتە جێگەکانیان و لە ئێستادا شەڕ لە ناوچەى بەشیرى باشورى کەرکوک لە نێوان پێشمەرگە و حەشدى شەعبى لەلایەک و داعش لەلاکەى تر بەردەوامى هەیە.

موقەدەم شەهاب محەمەد فەرماندەى فەوجى پێشمەرگە ، بە دەنگى ئەمەریکاى راگەیاند" لە خۆرئاواو و باشورى کەرکوکەوە زیاتر لە چل کیلۆمەتر پێشڕەویان کردووە."

ناوبراو دەڵێت" لە ئێستادا بە ئۆتۆمبێل تەنها پانزە خولەک لە قەزاى حەویجەوە دوورین."

هاوکات وەستا رەسوڵ فەرماندەى میحوەرى باشورى کەرکوک، دەڵێت"داعش لە ئێستادا هێزەکانى لە حەویجە و ریاز و رەشاد کۆکردووەتەوە."

بەڵام سۆران جەلال بەڕێوەبەرى پۆلیسى شارستانى ناحیەى تازە خورماتووى سەر بە پارێزگاى کەرکوک، بە دەنگى ئەمەریکاى راگەیاند"داعش ژمارەیەک لە گوندەکانى باشور و خۆراواى کەرکوکى بەجێهێشتووە و پێشمەرگە رۆیشتوونەتە جێگەکانیان، پێدەچێت قەزاى حەویجەش بەجێبهێڵن و بەرە و موسڵ بکشێنەوە."

ناوبراو دەڵێت"جگە لە هێزێکى زۆر حەشدى شەعبى کە هێنراونەتە تکریت، نزیکەى 29 هەزار پاسدارى ئێرانیش هێنراونەتە پارێزگاى سەڵاحەدین."

لاى خۆشیەوە نەجات حسێن فەرماندەى هێزەکانى حەشدى شەعبى لەکەرکوک، بە دەنگى ئەمەریکاى راگەیاند"لە قۆڵى تازە خورماتوو و بەشیرەوە هێزەکانمان لەگەڵ پێشمەرگەدا چوار کیلۆمەتر پێشرەویان کردووە و چەکدارەکانى داعش ناو بەناو بە چەکى قەناس تەقە دەکەن."

بەجێهێشتنى ژمارەیەک گوند لە دەوروبەرى کەرکوک لەلایەن داعش، لە کاتێکدایە شەڕ لەناو شارى تکریت لە نێوان حەشدى شەعبى و داعش بەردەوامى هەیە و تەواوى ناوچەکانى دەوروبەرى تکریت لە داعش پاککراونەتەوە.

XS
SM
MD
LG