Accessibility links

حەشدى شەعبى ئامادەکارى دەکات بۆ هێرشکردنە سەر قەزاى حەویجە


حەشدى شەعبى ئامادەکارى دەکات بۆ دەستپێکردنى هێرشێکى بەرفراوان بۆ سەر قەزاى حەویجەى رۆژئاواى کەرکوک و نوێنەرانى کەرکوکیش لە پەرلەمانى عێراق هۆشدارى دەدەن لەوەى هێرشەکە شەڕێکى مەزهەبى گەورەى لێدەکەوێتەوە.

بەپێى زانیاریەکانى دەنگى ئەمەریکا، چەند رۆژێک لەمەوبەر فەرماندەکانى حەشدى شەعبى بە سەرۆکایەتى هادى عامرى سەرۆکى رێکخراوى بەدر لە پارێزگاى دیالە کۆبوونەتەوە و پلانى هێرشکردنە سەر قەزاى حەویجەیان داڕشتووە.

زەکى کەمال کە فەرماندەیەکى باڵاى حەشدى شەعبی‌یە لە کەرکوک، ئاماژە بەوە دەکات 5 هەزار چەکدارى حەشدى شەعبى لە بەغداوە بەرەو پارێزگاى سەڵاحەدەین کەوتوونەتە ڕێ بۆ جێبەجێکردنى پلانى هێرشکردنە سەر قەزاى حەویجە، دەڵێت" کاتژمێرى سفر بۆ هێرشکردنە سەر حەویجە دانراوە."

قەزاى حەویجە لە ئێستادا ژمارەیەکى زۆر چەکدارى داعشى تێدا جێگیر کراوە و ئەو چەکدارانە خۆیان بۆ بەرەنگاربوونەوەى هێزەکانى حەشدى شەعبى ئامادە دەکەن لە حاڵەتى هێرشکردنە سەریاندا.

محەمەد سوور دووشیوانى یەکێک لە نوێنەرانى کەرکوک لە پەرلەمانى عێراق، بە دەنگى ئەمەریکاى راگەیاند"پەلاماردانى حەویجە لە لایەن حەشدى شەعبیەوە قورس دەبێت، چونکە ناوچەکە پڕ بووە لە ناکۆکى تایەفى و مەزهەبى."

ناوبراو ، دەڵێت"ئەگەر حەشدى شەعبى لەبرى سوپاى عێراق ببێتە سەر قافڵەى هێرشکردنە سەر قەزاى حەویجە، شەڕێکى گەورەى مەزهەبى روودەدات."

هاوکات لەگەڵ خۆئامادەکردنى حەشدى شەعبى دا بۆ هێرشکردنە سەر قەزاى حەویجە، دوێنێ لەناو شارى کەرکوک چەند چەکدارێکى داعش دەستگیرکران کە بۆ کۆکردنەوەى زانیارى نێردرابوون.

XS
SM
MD
LG