Accessibility links

پادشای نوێی عه‌ره‌بستانی سعودیه‌ دیارده‌کرێت

  • VOA News

له‌ شانشینی عه‌ره‌بستانی سعودیه‌ مه‌ڕاسیمی به‌ خاک سپاردنی شا عه‌بدوڵا به‌ڕێوه‌ ده‌چێت پاش چه‌ند کاژمێرێک له‌ گواستنه‌وه‌یه‌کی ئاساییانه‌ی ده‌سه‌ڵات له‌ ڕێی ده‌ستنیشان کردنی پادشای نوێ و هه‌روه‌هاش شازاده‌ی تاج.

شا عه‌بدوڵا که‌ بۆ ماوه‌یه‌کی درێژ هاوپه‌یمانی وڵاته‌ یه‌کگرتووه‌کانی ئه‌مریکا بووه‌ له‌ شه‌ڕی دژی تێرۆریزم و توندڕه‌وانی ئیسلامیدا ڕۆژی هه‌ینی مرد وه‌ بڕوا وایه‌ ته‌مه‌نی 90 ساڵ بووبێت و بۆ ماوه‌یه‌کیش نه‌خۆش بووه‌.

سه‌لمان، زڕ برای شا عه‌بدوڵا، وه‌ک پادشای وڵاته‌که‌ جێی ده‌گرێته‌وه‌ و هه‌روه‌ها موقرن که‌ ئه‌میش هه‌ر زڕبرای بووه‌ کراوه‌ته‌ شازاده‌ی تاج.

پادشای نوێی عه‌ره‌بستانی سعودیه‌ له‌ وتارێکی ته‌له‌فزیۆنیدا په‌یمانی گرتنه‌به‌ری هه‌مان سیاسه‌ته‌کانی شا عه‌بدوڵای داوه‌ .

شا سه‌لمان وه‌ک ده‌گوترێت ته‌مه‌نی 79 ساڵه‌، پێشتر شازاده‌ی تاج بووه‌ و له‌ ساڵی 2012 ه‌شه‌وه‌ وه‌زیری به‌رگری شانشینی عه‌ره‌بستانی سعودیه‌ بووه‌.

هه‌ر ئه‌مڕۆ هه‌ینی شا سه‌لمان موحه‌مه‌د بن نایف ی برازای وه‌ک جێگری شازاده‌ی تاج ده‌ستنیشان کردووه‌ و هه‌روه‌هاش موحه‌مه‌د بن سه‌لمانی کوڕیشی کردووه‌ به‌ وه‌زیری به‌رگری و هه‌روه‌هاش به‌ سه‌رۆکی دادگای پادشایه‌تی.

پادشای نوێی شانشینی عه‌ره‌بستانی سعودیه‌ ده‌ڵێت زۆرێک له‌ وه‌زیره‌کان له‌ پۆسته‌کانی خۆیاندا ده‌هێڵێته‌وه‌.

سه‌رۆک ئۆباما پرسه‌ و ماته‌می خۆیو هه‌روه‌هاش هاوسۆزی گه‌لی ئه‌مریکای ده‌ربڕیوه‌ بۆ گه‌لی عه‌ره‌بستانی سعودیه‌ و خانه‌واده‌ی پادشایه‌تی.

سه‌رۆک ئۆباما ده‌ڵێت شا عه‌بدوڵا هه‌میشه‌ که‌سێکی ڕاشکاو بووه‌ له‌ بڕیاره‌کانیدا ئازا و بوێرانه‌ بووه‌ له‌وانه‌ به‌کارهێنانی په‌یوه‌ندیه‌کانی وڵاته‌ یه‌کگرتووه‌کانی ئه‌مریکا و شانشینی عه‌ره‌بستانی سعودیه‌ وه‌ک هێزێک بۆ ئاسایش و سه‌قامگیری.

XS
SM
MD
LG