Accessibility links

وەزیرى کۆچ و کۆچبەرانى عێراق: ژمارەى ئاوارەکان گەیشتووەتە 2,460 ملیۆن کەس


وەزیرى کۆچ و کۆچبەرانى حکومەتى عێراق ، ئاشکرایدەکات ژمارەى ئەو خێزانانەى لە ناوچە جیاجیاکانى عێراق بەهۆى شەڕى داعشەوە ئاوارەبوون گەیشتووەتە 487 هەزار خێزان کە دەکاتە دوو ملیۆن و چوارسەد و شەست هەزار کەس و ئەم ژمارەیەش رۆژانە لە زیادبووندایە.

هەڵکشانى ژمارەى ئاوارەکانى عێراق لە کاتێکدایە ئاوارەکان بەهۆى سەرما و سۆڵەى زستانەوە لە بارودۆخێکى مرۆیى خراپدان و حکومەتى عێراقیش لە بودجەى ساڵى 2015 بڕى یەک تریلیۆن دینارى عێراقى بۆ ئاوارەکان تەرخانکردووە.

دکتۆر دەرباز محەمەد وەزیرى کۆچ و کۆچبەرانى حکومەتى عێراق، بە دەنگى ئەمه‌ریکاى راگەیاند"50% ى ئاوارەکانى عێراق ڕوویان لە هەرێمى کوردستان کردووە و 20% یشیان لەو ناوچە جێناکۆکانەن کە لەلایەن هەرێمى کوردستانەوە ئیدارە دەدرێن."

هەرچەندە بەشێک لەناوچەکانى عێراق لە ژێر کۆنترۆڵى داعش دەرهێنراون و لەلایەن سوپاى عێراقەوە کۆنترۆڵکراونەتەوە ، بەڵام بەهۆى بۆمب رێژکردنى ئەو ناوچانە لەلایەن داعشەوە تا ئێستا دانیشتوانەکەیان نەگەراونەتەوە سەر ماڵ و حاڵیان.

وەزیرى کۆچ و کۆچبەرانى عێراق، ئاماژە بەپلانى وەزارەتەکەى دەکات بۆ گێرانەوەى ئاوارەکان بۆ ناوچە ئازادکراوەکان ، جەخت لەسەر ئەوەدەکاتەوە تا پرۆسە سەربازیەکان لەو ناوچانە کۆتایى پێنەهێنرێت و دەستى خزمەتگوزاریان بۆ درێژ نەکرێتەوە ئاوارەکان ناگەرێنرێنەوە سەر ماڵ و حاڵیان.

ئاوارەکانى عێراق لە پاڵ گرفتى دەروونى و کۆمەڵایەتى و ئەمنى دا کە بەهۆى شەڕى داعشەوە دووچارى بوون ، هاوکات لەڕووى ئابووریشەوە زەرەرمەند بوون و بەشێکى زۆریان ماڵ و حاڵیان لەدەستداوە و خانووەکانیشیان تەقێنراوەتەوە.

دەربارەى پلانى حکومەتى عێراق بۆ قەرەبووکردنەوەى ئاوارەکان، دکتۆردەرباز محەمەد وتى"قەرەبووکردنەوەى ئاوارەکانى عێراق بودجەیەکى گەورەى دەوێت و هێشتا حکومەتى عێراق بڕیارێکى لەو شێوەیەى نەداوە".

بەردەوامى شەڕى داعش و دابەزینى نرخى نەوت و کێشە نێوخۆییەکان حکومەتى عێراقیان تووشى گرفتى گەورە کردووە، لە پاڵ ئەو گرفتانەشدا زۆرى ژمارەى ئاوارەکانیش هێندەى تر بارى سەر شانى حکومەتى قورستر کردووە.

please wait

No media source currently available

0:00 0:04:53 0:00

XS
SM
MD
LG