Accessibility links

سه‌رۆک ئۆباما مۆڵه‌تی هێرشکردنه‌ سه‌ر داعش به‌ هێزی ئاسمانی ئه‌مه‌ریکا ده‌دات


سه‌رۆکی ویلایه‌ته‌ یه‌کگرتووه‌کانی ئه‌مه‌ریکا براک ئۆباما ده‌ڵێت مۆڵه‌تی به‌ فڕۆکه‌ له‌شـکریـیه‌کانی وڵاته‌که‌ی داوه‌ هێرشی ئاسـمانی بکه‌نه‌ سه‌ر چه‌کدارانی داعش له‌ باکوری ڕۆژئاوای عێراق و هه‌روه‌ها ئه‌گه‌ر بێت و له‌ هه‌ولێری پایته‌ختی هه‌رێمی کوردسـتان نزیک بکه‌ونه‌وه‌.

سه‌رۆک ئۆباما شه‌وی پـێـنجشه‌ممه‌ له‌ کۆشـکی سـپی ئه‌مه‌ی ڕاگه‌یاند و گوتی فڕۆکه‌ی ئه‌مه‌ریکایی خۆراک و ئاوی گه‌یاندووه‌ته‌ ئه‌و ئاوارانه‌ی له‌ له‌ لایه‌ن داعشه‌وه‌ هه‌ڕه‌شه‌یان له‌سه‌ره‌.

پـێشـتر کاربه‌ده‌سـتێـکی ئه‌مه‌ریکایی گوتی فڕۆکه‌کانی ئه‌مه‌ریکا ئه‌رکه‌ مرۆیـیه‌که‌ی خۆیان له‌ نزیک شـارۆچکه‌ی شه‌نگال به‌ ئه‌نجام گه‌یاند و پاشان به‌ سه‌لامه‌تی ناوچه‌که‌یان جێهێشـتووه‌.

سه‌رۆک ئۆباما له‌ وتاره‌که‌شی گوتی ئه‌مه‌ریکا ناتوانێت چاوپـۆشـی بکات له‌ پـێشـڕه‌وی چه‌کدارانی داعش به‌ تایبه‌تی به‌ ئاڕاسته‌ی شـاری هه‌ولێر که‌ له‌وێ کونسوڵخانه‌ی ئه‌مه‌ریکای لێـیه‌ و هه‌روه‌ها که‌سانی ئه‌مه‌ریکایی چ مه‌ده‌نی و چ سه‌ربازی ئه‌وانه‌ی له‌ لایه‌ن عێراقیـیه‌کانه‌وه‌ ڕاوێژکاریـیان پێـده‌کرێت.

به‌ڵام له‌گه‌ڵ ئه‌وه‌شدا جه‌ختی له‌وه‌ کرده‌وه‌ هێزی پـێاده‌ی له‌شـکری ئه‌مه‌ریکا بۆ عێراق ڕه‌وانه‌ ناکرێت.

XS
SM
MD
LG